ପିତା ମାତା
ପିତା ମାତା
ପିତା ମାତା ପରି ଆଉ କେ ଅଛି ସଂସାରେ
ଧନ୍ୟ ସେ ଯେ ଦିଏ ପ୍ରାଣ ତାଙ୍କରି ସେବାରେ |
ପିତା ଧର୍ମ ପିତା ସ୍ୱର୍ଗ ପିତା ଅପବର୍ଗ
ପିତାହିଁ ପରମ ତପ ପିତା ସର୍ବ ଭଗ |
ସନ୍ତାନ ପାଇଁକି ପିତା ଦୃଶ୍ୟ ଭଗବାନ
ପିତା ତାର ପରିଚୟ କରଇ ପ୍ରଦାନ |
ମାତା ତ ମମତାମୟୀ ବାତ୍ସଲ୍ୟ ଦାୟିନୀ
ପିଣ୍ଡର କାରିଣୀ ମାତା ଗରଭ ଧାରିଣୀ |
ଦଶ ମାସ ଦଶ ଦିନ ଧରିଲା ଉଦରେ
ସହି ପ୍ରସୂତି ବେଦନା କଷ୍ଟ ଅକାତରେ |
ସ୍ତନ୍ୟ ଭାଙ୍ଗି କ୍ଷୀର ପାନେ ପୁଷ୍ଟ କଲା ତନୁ
ନିଜ ସୁଖ ବରଜିଲା ତା ମୁଖ ଦର୍ଶନୁ |
ପିତା ମାତା ସ୍ନେହ ତ୍ୟାଗ କେବା ବର୍ଣ୍ଣିପାରେ
ମାତା ପେଟ ପିତା ପିଠି ଦଇବ ବିଚାରେ |
ପାଳି ପୋଷି ଯତନରେ କରିଲେ ମଣିଷ
ନୀଳକଣ୍ଠ ସାଜି ପିଇ ସଂସାରର ବିଷ |
ସନ୍ତାନ ପାଇଁକି ଦୁହେଁ ଦେଖିଲେ ସପନ
ଗଳାମାଳୀ ଦୁଃଖୀ ଧନ ସେ ରଙ୍କ ରତନ |
ଜର ରୋଗ ହେଲେ ଦୁହେଁ ହରାଇଲେ ନିଦ
ସୁତା ସୁତ ଭବିଷ୍ୟତ ଗଢିବାରେ ସିଦ୍ଧ |
ପିତା ମାତା ଋଣ କିଏ ଶୁଝିବ ମହୀରେ
ତାଙ୍କରି ଆଶିଷ ସାହା ବିପଦ ନଈରେ |
ରାମଚନ୍ଦ୍ର କୃଷ୍ଣ ଭୀଷ୍ମ ଯଯାତି ରାଜନ
ଶ୍ରବଣ କୁମାର ଥିଲେ ସୁପୁତ୍ର ରତନ |
ପିତୃ ଦ୍ରୋହୀ ମାତୃ ଦ୍ରୋହୀ ନରକେ ପତନ
ଏଣୁ ପିତା ମାତା ପଦେ ଦିଅ ସଦା ମନ |