ପହିଲି ମୌସୁମୀ

ମାଟିର ଗନ୍ଧରେ ତୁମ ଆଗମନୀ

ବାରତା କେ ଆଣି ଦିଏ

କଞ୍ଚା ବୟସର କଦମ୍ବ ଡାହିରେ

ଫୁଲଟିଏ ଫୁଟିଯାଏ ..

ମନର ଝରକା ଦେଇ ପଶିଆସେ

ତୁମର ମାଦକ ଛୁଆଁ 

ଆଷାଢ ଏନ୍ତୁଡ଼ି ଶାଳେ ଶୁଭିଯାଏ

ପହିଲି ମୌସୁମୀ କୁଆଁ

ଲାଜେ ଲାଜେ ଜହ୍ନ ଲୁଚାଏ ତା ମୁହଁ 

ତୁମ ପାଦ ଶବଦରେ

ପବନରେ ତୁମ ଶୀତଳ ସଙ୍ଗୀତ 

ମହକ ବୁଣେ ଫୁଲରେ

ପାହାଡ ଚୂଡାରେ କୃଷ୍ଣଚୂଡ଼ା ପୁଣି

ଅଭିସାର ଆସି ରଚେ

ମେଘୁଆ ସଞ୍ଜଟା ନିରୋଳାରେ ଆସି

ଚୁମାଟିଏ ମତେ ଯାଚେ...

ଅଜଣା ପୁଲକେ ଦେହ ମୋର କମ୍ପେ

ସାରା ରାତି ଚେଇଁ ଚେଇଁ 

ପାହାଡ ଛାତିରେ ନିଆଁ ଲାଗିଯାଏ

ସଞ୍ଜ ଯେବେ ଆସେ ନଇଁ...

ବର୍ଷାତ ଆସିଲେ ଖୋଲିଦିଏ ମୋର

ସ୍ମୃତିର ନିବୁଜ ଘର 

ମନେ ପଡିଯାଏ ସ୍ମୃତିଭିଜା ରାତି 

ଭିଜା ସେ ଅଲିଭା ଗାର...