ଫିକ୍କା ଦଶହରା
ଫିକ୍କା ଦଶହରା
ପୂଜା ଋତୁ ମଜା ଫିକ୍କା ପଡିଗଲା
କୋରନାରେ ସଂକ୍ରମିତ ।
ଭକ୍ତ ବିହୁନରେ ମାଆଙ୍କର ପୂଜା
ଦେଖିଲା ଆଜି ଏ ନେତ୍ର ।୧।
ଶାରଦୀୟ ପର୍ବ ମନୋରମ ଆଭା
ତୋରଣର ସାଜସଜା ।
ଆଲୋକ ମାଳାର ଚିକିମିକି ଦୃଶ୍ୟ
ଦେଉନାହିଁ ଆଉ ମଜା ।୨।
ରୂପେଲି ସୁନେଲି ଚାନ୍ଦି ରୂପା ମେଢ଼
ଦେଖିବା ସପନ ଆଜି ।
ଦୁର୍ଗା ମଣ୍ଡପର ସମ୍ମୁଖେ ପରଦା
ଆଖି ପାଉନାହିଁ ଖୋଜି ।୩।
କଟକ ପ୍ରସିଦ୍ଧ ଦୁର୍ଗା ପୂଜା ଯାତ୍ରା
ଗହଳି ଚହଳି ନାହିଁ ।
ମାତାଙ୍କ ଦର୍ଶନ କରୁଛନ୍ତି ଭକ୍ତ
ଧାଡି ଧାଡି ଠିଆ ହୋଇ ।୪।
ମୁଖେ ମୁଖା ପିନ୍ଧି ନିରବ ଦର୍ଶକ
ପାଟି ଖୋଲିବାକୁ ମନା ।
କଠୋର ନିୟମ ପୂଜାରେ କାୟମ
ପୋଲିସର ତନାଘନା ।୫।
ଦୋକାନ ବଜାର ଦ୍ୱାର ଦେଶେ ବନ୍ଧା
ବାଉଁଶ ଓ ମୋଟା ରସି ।
କ୍ରେତା ବିକ୍ରେତାଙ୍କ ମଝିରେ ପାଚିରି
କ୍ରେତା ଯାଉଛନ୍ତି ଋଷି ।୬।
ବିଚରା ବେପାରୀ ବେପାର ବିହୁନେ
ଦୁଃଖରେ ବସୁଛି ଚାହିଁ ।
କେମିତି ପୋଷିବ ପରିବାର ତା'ର
ବୁଦ୍ଧି ବାଟ ଦିଶୁ ନାହିଁ ।୭।
ଛୁଆ ଅଳି କରେ ମେଢ଼ ଦେଖି ଯିବ
ବାପା କରେ ନାହିଁ ନାହିଁ ।
ମାଆ ବୋଧ ଦିଏ କୋରନା ବୁଲୁଛି
ଗଲେ ଯିବ ତୋତେ ଖାଇ ।୮।
ବିଚରା ବାଳୁତ ସରଳ ମନରେ
ରାଗ ଜରଜର ହୋଇ ।
କିଏ ସ କୋରନା କାହିଁକି ବୁଲୁଛି
ଭାବି ଭାବି ଯାଏ ଶୋଇ ।୯।
ମାଗୋ ଦୟାମୟୀ ବାରେ ଦୟାବହି
ଜଗତ ମଙ୍ଗଳ ପାଇଁ ।
କୋରନା ରାକ୍ଷସ ଵଧ କରିବାକୁ
ଶକ୍ତି କିବା ତୋର ନାହିଁ ।୧୦।
କେତେ ହନ୍ତସନ୍ତ ହେବୁ ଲୋ ଜନନୀ
ଜୀବନ ଜୀବିକା ନାଶ ।
ଭୋକ ଉପାସରେ ମରିଯିବେ ସର୍ବେ
ନାହିଁ ଆଉ ଅବକାଶ ।୧୧।
ମଙ୍ଗଳ କାରିଣୀ ଦୁର୍ଗତି ନାଶିନୀ
ଅସହ୍ୟ କଷ୍ଟ ଓ ଦୁଃଖ ।
ଚରଣେ ଶରଣ ଦୋଷ କ୍ଷମା କରି
କୋରନା କବଳୁ ରଖ ।୧୨।