"ଫେରିଛି ବସନ୍ତ "
"ଫେରିଛି ବସନ୍ତ "
ଉନ୍ମାଦିତ ବୃକ୍ଷରାଜି ଜରାଜୀର୍ଣ୍ଣ ପତ୍ରରାଶି
ଲୋଟିଲେଣି ଧରା ପୃଷ୍ଠେ ହୋଇ ଦୁର୍ବଳ
ମଳୟ ମନ୍ଦ ଗନ୍ଧରେ ପ୍ରତି ଅଙ୍ଗେ ରୋମାଞ୍ଚିତ
ବିବିଧ ରଙ୍ଗେ ଚିତ୍ରିତ ନବ ପଲ୍ଲବ ଦଳ ।
ରଚିବ ପଞ୍ଚମ ତାନ କୋକିଳ ଚଳ ଚଞ୍ଚଳ
ସଙ୍ଗେ ହଳଦୀ ବସନ୍ତ ନୟନେ ଲେପି କଜ୍ଜଳ
ବକୁଳ ବଉଳ ଦଳେ ହୋଇଣ ସଙ୍ଗତେ ମେଳ
ସ୍ଵାଗତଂ ଋତୁ ରାଜ ଆସ ହେ ମହୀ ମଣ୍ଡଳ ।
ରଙ୍ଗ ବେରଙ୍ଗ ଅବିର ଫଗୁଣ ଫଗୁର ମେଳ
ଦୋଳ ମଣ୍ଡପରେ ବିଜେ ଯଶୋଦା ନନ୍ଦ ଦୁଲ୍ଲାଳ
ରଙ୍ଗେ ରଙ୍ଗ ପିଚକାରୀ ଅଙ୍ଗେ ଅଙ୍ଗେ ଦିଅ ବୋଳି
ପ୍ରିତୀ ପ୍ରେମେ ବିମୋହିତ ବୃଦ୍ଧ,ବନୀତା,ଆବାଳ ।
ତୁମ ନାମେ କବିକୁଳ ଲେଖନୀ ଚଳଚଞ୍ଚଳ
ଶବଦେ ଶବଦ ମେଳ କରାନ୍ତି କାଗଜେ ଖେଳ
ଆସ ଆସ ଋତୁ ରାଜ ସୁସଜ୍ଜିତ ଏ ମଣ୍ଡଳ
ତୁମ ପଥ ଚାହିଁ ଅଛି ସଜୀବ ବଡ଼ ବ୍ୟାକୁଳ ।