ଫେରିଆ ମୌସୁମୀ
ଫେରିଆ ମୌସୁମୀ
ଫେରିଆ ମୌସୁମୀ ତୋତେ ମୋର ରାଣ
ତୋର ପାଇଁ କେତେ ସହିବି କଷଣ l
ଦୁଃଖେ ଫାଟିଲାଣି ହୃଦୟ ମୋହର
କର ନାହିଁ ତୁହି ଏତେ ହତାଦର l
ବୋହୁନି ନୟନୁ ଆଉ ଅଶ୍ରୁଧାର
ହୃଦୟରେ ଆଜି ନାହିଁ ମୋର ନିର l
କାନ୍ଦେ ତରୁଲତା ପଶୁପକ୍ଷୀ ମୋର
ମା' ହୋଇ ବୁଝେନି ହୃଦୟ ତାଙ୍କର l
ତୋର ପାଇଁ ପିନ୍ଧେ ସବୁଜର ବସ୍ତ୍ର
ଫଟା ଚିରା ପିନ୍ଧି ହୋଇଛି ଵିଵସ୍ତ୍ର l
ବରଷେ ହେଲାଣି କେଉଁଠି ରହିଛୁ
ଫେରିବାକୁ କେତେ ପ୍ରତୀକ୍ଷା କରିଛୁ l
ଅନ୍ୟ ଦେଶ କଥା ସତରେ ବୁଝୁଛୁ
ଆଜି ଏଠି ସର୍ବେ ଦୁଃଖରେ ଝୁରୁଛୁ l
ଜୀବଜନ୍ତୁ ଆଜି ତୃଷାରେ ବିକଳ
ବୃକ୍ଷ ଲତା ସବୁ ଧରଇ ଅନଳ l
ଶୁଭୁନାହିଁ ଆଜି ଚିଡ଼ିଆର ଡାକ
ରାବୁ ନାହିଁ କାକ ଆଉ ସେ ଡାହୁକ l
କହିଲେଣି ସର୍ବେ ପଡିଲା ଦୁର୍ବିକ୍ଷ
ଅନ୍ୟ ଦେଶ ଯାଇ ହୋଇବୁ ଭିକ୍ଷୁକ l
ଫେରିଆ ମୌସୁମୀ ବରଷାର ରାଣୀ
ବାଦଲ ଫଟାଇ ଢ଼ାଳିଦେ ତୁ ପାଣି l
ଭରିଦେ ସରିତା ଆଉ ପୁଷ୍କରିଣୀ
ହସୁ ବୃକ୍ଷ ଲତା କରିଦେ ତୁ ଋଣୀ l
ପରିବେଶ ରକ୍ଷା ଜୀବନ ସୁରକ୍ଷା
ଭୁଲିନି ମାନବ ଆଜି ନେଲା ଶିକ୍ଷା l
ପରିବେଶ ପାଇଁ ହେବ ଯତ୍ନବାନ
ଦୁଃଖ ଦେବ ନାହିଁ ତୋର ଆଗମନ l
ଫେରିଆ ଫେରିଆ ମୌସୁମୀ ଆମର
କେବେ କର ନାହିଁ ପାତର ଅନ୍ତର l
ଶୁଣହେ ସନ୍ତାନେ ବସୁଧା ମାତାର
ଚିର ଦୁଃଖ ଆମ ହୋଇ ଯିବ ଦୂର l
ମୌସୁମୀ ଆମର କରିବନି ରୋଷ
ସନ୍ତୁଳନ ଯଦି ହେବ ପରିବେଶ l
ମୌସୁମୀ ମୋହର ଦେବନି ଆଘାତ
ହସି ହସାଇବ ଏ ସାରା ଜଗତ l