ପାଳଭୂତ

ଆକାଶରେ ମାରେ ଡିଆଁ ଖାଏ ଅଳ୍ପ ଭାତ l

ପାଳ ଜଗିଛି ମୁଁ କ୍ଷେତ୍ର ପାଳ ପାଳ ଭୂତ ll

ପ୍ରାଣହୀନପିଣ୍ଡ ମୋର ଗୋଡ଼ ଡେଙ୍ଗାଡେଙ୍ଗା l 

ଲମ୍ବାଲମ୍ବା ହାତେ ମୋର ଚାରିହାତି ଠେଙ୍ଗା ll

ବର୍ଷା ଶୀତ ଗ୍ରୀଷ୍ମ ଖରା ବର୍ଷା ଆଉ ତାତି l

କର୍ତ୍ତବ୍ୟ ମୋ କ୍ଷେତ ଜଗି ଥାଇ ଦିନ ରାତି ll

ହାଣ୍ଡି ଦିଆ ମୁଣ୍ଡ ମୋର ଲମ୍ବା ଲମ୍ବା ନିଶ l

ମିଟି ମିଟି ଆଖି ଦୁଇ ସଦା ନିର୍ଣ୍ଣିମେଷ ll

ହାତ ହଲାଇ ପବନେ କରେ ହୋ ହୋ l

ଭୟ ସଞ୍ଚାରି କହଇ ଧୋ ବାଇଆ ଧୋ ll

କ୍ଷେତୁଁ ପଳାନ୍ତି ବିହଙ୍ଗେ ହୁରୁଡ଼ି ହୁରୁଡ଼ି l

ଟେକାମାରନ୍ତି ବାଳୁଙ୍ଗା ପିଲା ମୋତେ ଭିଡ଼ି ll

କ୍ଷେତରେ ମୁଁ ରହି ଅଛି ଆଆଁ କରି ପାଟି l

ମାଲିକ ମୋ ନେଇଗଲା କ୍ଷେତଯାକ କାଟି ll

କ୍ଷେତଜଗା ପାଳ ଭୁତ ଧନ୍ୟ ମୋ ଜୀବନ l

ପ୍ରତୀକ୍ଷା ମୋହର ମୁଁ କର୍ତ୍ତବ୍ୟ ପରାୟଣ ll