ପାଦଧୂଳି
ପାଦଧୂଳି
ମାଆ ପାଦ ତଳେ କଣିକାଏ ଧୂଳି
ମୋ ମାଥେ ବିଜୟ ଟୀକା
କୋଟି ପୂଣ୍ୟ ତୀର୍ଥ ସେ ଧୂଳି ଚନ୍ଦନ
ମୋ ସୈ।ଭାଗ୍ୟ ସୀମାରେଖା ।
ପୁଲକେ ଆନନ୍ଦେ ମହକେ ସୁଗନ୍ଧେ
ତା ଶ୍ରୀପଦ ମହମହ
ତାର ପାଦ ପଦ୍ମେ ମୋ ସୁଖ ସମ୍ପଦ
ମଣଇ ମୁଁ ବରାଭୟ ।
ସରଗ ଐଶ୍ୱର୍ଯ୍ୟ ତା ନିକଟେ ତୁଚ୍ଛ
ମାତା ପାଦେ ଲୋଟୁ ମଥା
ବରଷେ ଅମୃତ ଜନ୍ମଦାତ୍ରୀ ମାତା
ପ୍ରିୟ ସ୍ନେହ ବୋଳା କଥା ।
ମାଆର ହୃଦୟ ମାଟିରୁ ଆକାଶ
ସୁମଙ୍ଗଳେ ପରିବ୍ୟାପ୍ତ
ସୃଜଇ ପାଳଇ ସବୁଜ ସୁନ୍ଦରେ
ଗୁଞ୍ଜେ ଜୀବନ ସଙ୍ଗୀତ ।
ମାଆ ତ ବସୁଧା ଅଟେ ସର୍ବଂସହା
ଜନନୀ ସେ ଜନ୍ମଭୂମି
ମାଆ ନାଦବ୍ରହ୍ମ ଶବ୍ଦ ମାତୃଭାଷା
ସ୍ୱର୍ଗ ଠାରୁ ଗରୀୟସୀ ।
ମାଆ ଆଦିମୂଳ ମୋର ବର୍ତ୍ତମାନ
ମୋ ସୁନ୍ଦର ଭବିଷ୍ୟତ
ତାର ପାଦଧୂଳି ମୁଣ୍ଡେ ହୋଇ ବୋଳି
କରେ କୋଟି ଦଣ୍ଡବତ ।