ପାଦଚିହ୍ନ
ପାଦଚିହ୍ନ
କେତେଯେ ଫଗୁଣ ଆସି ଚାଲିଗଲେ
ଫୁଲର ମହକ ନେଇ
କେତେଯେ ଶ୍ରାବଣ ଝରି ପଡ଼ିଥିଲେ
ଲୁହ ଦୁଇଧାର ହୋଇ ।
ବେଳାଭୂମି ପରେ ଆଜିବି ଦିଶୁଛି
ତୁମ ଦୁଇପାଦ ଚିହ୍ନ
ଫେରିବାକୁ କହି ଫେରିବା ପାଇଁକି
ବଳାଇ ନ ଆଉ ମନ ।
କେତେ ଜହ୍ନରାତି କଟିଛି ଏମିତି
ଏଇ ବେଳାଭୂମି ତଟେ
କେମିତି କହିବି କାଳ ବଇଶାଖୀ
ମଥାପରେ ଝାଞ୍ଜି ପିଟେ ।
ଆସିଥିଲା ମାଡି ସାଗର ଲହଡି
ଧୋଇନେବା ପାଇଁ ଯେବେ
ତୁମ ପାଦଚିହ୍ନ ଦେଖି ଲେଉଟିଲା
ଆଉ ଆସିନାହିଁ କେବେ ।
ତଥାପି ତୁମର ଫେରନ୍ତା ପଥକୁ
ଆଜି ମୁଁ" ରହିଛି ଚାହିଁ
କିଏ ବା ଜାଣିଛି କାଲିର ସକାଳ
ଆଉ ଆସିବ କି ନାହିଁ ।