ଓଠ ତଳ ହସ"

ଓଠ ତଳ ହସ ଲୁଚାଇ ବୁନି ତୁ

 ଝରାଇବୁ ସବୁବେଳେ,

 ନୁଆ ଦୁନିଆ ତୋ ଅପେକ୍ଷା କରିଛି

 ତୋଳି ନେବେ ଅଞ୍ଜୁଳିରେ।

 ଆଣିଛିନ୍ତି ତୋତେ ବାପା ,ମାଆ ତୋର

 ସସମ୍ମାନେ ଏହି ଘରେ,

 ଜନ୍ମ ନ ଦେଲେ ବି ଜନ୍ମଦାତା ଭଳି

 ରହିବୁ ତାଙ୍କ ପାଖରେ।

 ଜୀବନ ସାଥି ତୋ ହୀରା ଲିଳା ମୋତି

 ନ ଦେଲେ ଦେବ ଜୀବନ,

 ସୁଖ ,ଦୁଃଖ ,ହସ ,କାନ୍ଦ ସାଥେ ସାଥି ହେବ

 ସଜାଇବ ତୋର ମନ।

 ତୋ ଓଠ ତଳ ହସ ବିନିମୟେ 

 କିଣିନେବୁ ସବୁ ଘରେ,

 ନିଜ ସମ୍ପର୍କୀୟ ମାନଙ୍କ ଅଭାବ

 କେବେ ନ ଭାବିବୁ ଥରେ।

ଏ ଘରେ କେବେ ଶାଶୁ ନରହିବ

ଶ୍ଵଶୁର ତ ବାପା ହେବେ,

ଶାଶୁ ମାଆ ହୋଇ ତୋ ହସ ସାଇତି

ଇତିହାସ ତ ରଚିବ।

ତୋ ଶାଶୁମା ର କଥାରେ ଭରସା

କରିଥିବୁ ସଦା ମାଆ,

ବିଶ୍ଵାସ ହରାଇ ହତାଶ ହେବୁନି

ପ୍ରତିଜ୍ଞା ତ ମୋର ଏହା।

 ଟିକେ ହସିଦେଲେ ମଧୁ ଝରିଯାଏ,

ତୋ କଥାରେ ଝରଇ ସୁଧା,

ଅଳପ ଲାଜରେ ଫୁଲ ଫୁଟିଯାଏ

 ଚାହାଣିତ ମନ ଲୋଭା ।

ବୋହୁ ଘରେ ଥିଲେ ତୁଳସୀ ଚଉରା

ବାସୁ ଥାଏ ମହମହ

ଖୁସିର ମଳୟ ସଦା ବହିଯାଏ

ପୁଲକିତ ଯେ ହୃଦୟ ।

ଅଗଣାରେ ଖେଳେ ସାତରଙ୍ଗୀ ରଶ୍ମି

ନୂତନ ଜୀବନ ଆସେ

ପ୍ରେମର ପୁଲକେ ପୁଲକିତ ପ୍ରାଣ

ଆଶୀର୍ବାଦ ର ହରସେ।

ସାତ ଜନମର ସମ୍ପର୍କ ଏ ଅଟେ

ଯୋଡିବ ସମ୍ପର୍କ ସେତୁ,

ମଧୁର ବଚନେ ହୃଦୟ କିଣିବ

ସୁନା ବୋହୁ ଅଟୁ ତୁ ।