ମହାପ୍ରଭୁଙ୍କ ଶ୍ରାଦ୍ଧବେଶ
ମହାପ୍ରଭୁଙ୍କ ଶ୍ରାଦ୍ଧବେଶ
ଶ୍ରୀକ୍ଷେତ୍ରରେ ବିଜେ ଜଗତ ଠାକୁର
ଦିବ୍ୟଦାରୁ କଳେବରେ l
ମାନବୀୟ ଲୀଳା ବିସ୍ତାର କରନ୍ତି
ଜୟ ଜଗଦୀଶ ହରେ ll
ଯୁଗେ ଯୁଗେ ପ୍ରଭୁ ଧରି ଅବତାର
ଧର୍ମ ସଂସ୍ଥାପନ ଅର୍ଥେ l
ଦୁଷ୍ଟ ନିବାରଣ ଶିଷ୍ଟଙ୍କ ପାଳନ
ପରମାନନ୍ଦ ଜଗତେ ll
ସତ୍ୟ ଯୁଗେ ପ୍ରଭୁ ବାମନାବତାର
କଶ୍ୟପ ଅଦିତି ସୁତ l
ଭିକ୍ଷା ମାଗି ବଳି ପାତାଳେ ପେଷିଲେ
ଭୂମି ତିନିପାଦ ମାତ୍ର ll
ତ୍ରେତୟାରେ ପ୍ରଭୁ ରାମ ଅବତାର
ବଧ ହେଲା ଦଶାନନ l
ଦଶରଥ ପିତା କୋଉଶଲ୍ୟା ମାତା
ସେବକ ଶ୍ରୀ ହନୁମାନ ll
ଦ୍ୱାପରରେ ପ୍ରଭୁ କୃଷ୍ଣ ଅବତାର
ଜନମିଲେ ବନ୍ଦୀଘରେ l
ବସୁଦେବ ପିତା ଦଇବକୀ ମାତା
ପୁତ୍ର ଧରନ୍ତି କୋଳରେ ll
କଂସ ଡରେ ପୁଣି ଘନ ଅନ୍ଧକାରେ
ବସୁଦେବ ତାଙ୍କୁ ନେଇ l
ଗୋପପୁରେ ଛାଡ଼ି ଆସିଲେ ବାହୁଡ଼ି
କନ୍ୟା ଘେନି ପାଲଟାଇ ll
ବଡ଼ ଭାଗ୍ୟବନ୍ତୀ ନନ୍ଦ ଯଶୋମତି
କେତେ ଯୁଗ ତପ କରି l
କଳା କହ୍ନେଇକୁ ପାଳିଲେ ଯତନେ
ବାନ୍ଧି ବାତ୍ସଲ୍ୟର ଡୋରି ll
କଳିଯୁଗେ ହରି ଶ୍ରୀଦାରୁ ମୁରାରୀ
ଶ୍ରୀକ୍ଷେତ୍ରରେ ବିଜେ କଲ l
ଅବନ୍ତୀ ରାଜନ ରାଜା ଇନ୍ଦ୍ରଦ୍ୟୁମ୍ନ
ଗୁଣ୍ଡିଚା ରାଣୀ ଦୁଲାଳ ll
ଦେବ ଦୀପାବଳି ମହାପ୍ରଭୁ ହେଲେ
ଅପରୂପ ଶ୍ରାଦ୍ଧ ବେଶ l
ଚାରି ଯୁଗ ପିତା ମାତାଙ୍କୁ ପୂଜନ୍ତି
ମାନବେ ଦେଇ ସନ୍ଦେଶ ll
ପିତୃଙ୍କ ପୂଜନ କର ସଦା ପିତୃ
ଋଣ କେବା ସୁଝି ପାରେ l
ହେ ଲୀଳା ବିଧୃତ କଳେବର ନାଥ
ଜୟ ଜଗଦୀଶ ହରେ ll
ଜୟ ଜଗଦୀଶ ହରେ !!!