ଓଡ଼ିଆ ଜାତିର ଲଢୁଆ ବୀର-35: ମୂଷା ମଳିକ

ଢେଙ୍କାନାଳ ରାଜା ଶଙ୍କର ପ୍ରତାପ ଥିଲେ ପ୍ରଜା ଅତ୍ୟାଚାରୀ,

ସୁବାହୁ ସିଂହର ସିଂହନାଦ ଶୁଣି ଢେଙ୍କାନାଳ ଗଲା ଥରି |

ନକରି ଖାତର ପୁଲିସ ପାହାର ବିଦ୍ରୋହୀ ସାଜିଲେ ପ୍ରଜା,

ସମନ ପରାଏ ଦମନ କରିଲେ ସଇନ ଡକାଇ ରାଜା |

ଜୀବନ ଦେବାକୁ କିଏ ଆଗଭର ପଚାରିଲେ ନେତା ଜଣେ,

କହିଲେ ସେନାନୀ ମୂଷା ମଳିକ ମୁଁ ପହିଲେ ମରିବି ରଣେ |

ଗାନ୍ଧୀ ଡାକରାରେ ମଢିଥାନା ପୋଡ଼ି ଖମାରକୁ ନେଲେ ଲୁଟି,

ପରଜଙ୍ଗ ଥାନା ଘେରାଉ କରିଲେ ଯୋଗାଯୋଗ ତାର କାଟି |

ଜହ୍ନିପଡ଼ାଠାରେ ପ୍ରଭାକର ମିଶ୍ର ଛାଡ଼ିଲେ ବନ୍ଧୁକ ଗୁଳି,

ଦୁଇଜଣ ବୀର ଚିରଦିନ ପାଇଁ ଭୂଇଁରେ ପଡ଼ିଲେ ଢଳି |

ମୂଷା ମଳିକଙ୍କୁ ବନ୍ଦୀ କରିନେଲେ ହୁକୁମ ହୋଇଲା ଫାଶୀ,

ବିଶ୍ଵଯୁଦ୍ଧ ପାଇଁ ଫାଶୀକାଠ ତଳୁ ବଳେବଳେ ଗଲେ ଖସି |

(1942)