ଓଡ଼ିଆ ଜାତିର ଲଢୁଆ ବୀର-07: କୃତ୍ତିବାସ ପାଟଶାଣୀ

ଫିରିଙ୍ଗି ଶାସନ ପୁଲିସ ଜୁଲୁମ ଚାଲିଥାଏ ଓଡ଼ିଶାରେ,

ବାଣପୁର ରାଜା ଘୋଷଣା କରିଲେ-ସ୍ଵାଧୀନ ହେଲୁ ଆମେରେ |

ସ୍ଵାଧୀନତା ପାଇଁ ଜୀବନ ଦେବାକୁ ପାଇକ ମତେଇ ଆଣି,

ସେନାପତି ହେଲେ ଅରାଙ୍ଗଗଡ଼ର କୃତ୍ତିବାସ ପାଟଶାଣୀ |

ବାଣପୁର ଥାନା ଆକ୍ରମଣ କରି ତା’ପରେ ଚାଲିଲେ ଟାଙ୍ଗୀ,

ଧରାପଡ଼ି ପଞ୍ଚୁ ଫାଶିରେ ଝୁଲିଲେ ପାଇକର ବଳଭାଙ୍ଗି |

ପାଟଶାଣୀ ବୀର ଜଙ୍ଗଲରେ ଥାଇ ବିଦ୍ରୋହ ରଖିଲେ ତେଜି,

ଇଂରେଜ ଶାସକ ହେଲେ ହରବର କୃତ୍ତିବାସ ନାମ ଭଜି |

ବିଦ୍ରୋହୀଙ୍କୁ ଧରି ନିଅ ପୁରସ୍କାର ଯାଚିଦେଲେ ସରକାର,

ପାଟଶାଣୀଙ୍କର କପଟୀ ଶ୍ଵଶୁର ନେଲେ ସେହି ପୁରସ୍କାର |

ଗଲେ କଳାପାଣି ବୀର ପାଟଶାଣୀ ସପନ ରହିଲା ଅଧା,

କାରାଗାରେ ଥାଇ ହେଲେ ଲୋକପ୍ରିୟ ଦେଖାଇ ନିଜର ବିଦ୍ୟା |

ଦ୍ଵୀପର ଶାସକ କର୍ଜ୍ଜନ ବାଇଲ ଲୋଡ଼ିଲେ ତାଙ୍କର ମନ୍ତ୍ର,

ତା’ର ପ୍ରତିଦାନେ ମୁକ୍ତି କରିବାକୁ ବାହାର କରିଲେ ସୂତ୍ର |

ସାହେବ କହିଲେ-ମାଗିନିଅ ଯାହା ମୁକ୍ତି କିବା ଧନ-ମାନ,

ମାଗିଦେଲେ ବୀର ଶ୍ଵଶୁରଙ୍କ ମୁଣ୍ଡ ଯିଏ ଥିଲା ବେଇମାନ |

ଆଉ ଯଦି ହେବ ଭୂମିଖଣ୍ଡେ ଦିଅ ନଥିବ ଇଂରେଜ ଭୟ,

କରୁଥିବି ସଦା ଜନ୍ମଭୂମି ପୂଜା ଗାଇ ଜନନୀର ଜୟ |

ନରେନ୍ଦ୍ର ସିଂହର କଟାମୁଣ୍ଡ ଦେବା ଏ’ତ ଅସମ୍ଭବ କଥା,

ବାଇଲ ସାହେବ ହାର ମାନିଗଲେ ନୂଆଇଁ ନିଜର ମଥା |