ଓଡ଼ିଆଣି ମହାଲକ୍ଷ୍ମୀ

ଜୟ ଜୟ ମହାଲକ୍ଷ୍ମୀ ଶ୍ରୀକ୍ଷେତ୍ରରେ ରହୁ

ଜଗତର ଠାକୁରାଣୀ ଓଡ଼ିଆଣୀ ବୋହୁ l

ଖଣ୍ଡୁଆ ପାଟ ପିନ୍ଧୁ ମା ହାତେ ସୁନା ଖଡ଼ୁ

ସୁନାଚଟୁ ଧରି ମାଆ ନାନାଭୋଗ ବାଢ଼ୁ l

ପୟରେ ଝୁଣ୍ଟିଆ ନାଉ ନାଶାରେ ବସଣି

ଶିରେ ଜକ ଜକ ତୋର ରତ୍ନ ମଥାମଣି l

ନଣନ୍ଦ ସୁଭଦ୍ରା ସଙ୍ଗେ ସଦା ତୋର କଳି

ହସି ଦେଲେ ତାଳିମାରି ପ୍ରଭୁ ବନମାଳୀ l

ଦେଢ଼ଶୁର ସମ୍ମୁଖକୁ କେବେ ମା ନଯାଉ

ହାତେ ଓଢ଼ଣୀକୁ ଟାଣି କଥା କହୁ ଥାଉ l

ଜଗାସହ ଯେବେ ମାତ ହୋଇଯାଏ କଳି

ଜ୍ୟେଷ୍ଠସାମନ୍ତଙ୍କ ପାଶେ କରୁ ନିଉଛାଳି l

ଭଗ୍ନୀ ଭାଇ ଧରି ପ୍ରଭୁ ରଥେ ଗଲେ ବୁଲି

ଅଭିମାନେ ଶୋଇଲୁ ମା କବାଟକୁ କିଳି l

ଲାଞ୍ଚ ନେଲୁ ଆଣ୍ଟ କରି କଳାମେଘୀ ପାଟ

ଖୋଲିଦେଲୁ ସିଂହ ଦ୍ୱାର ଅମୁହାଁ କବାଟ l

ମଗୁଶିର ମାସେ ମାଆ ଘରେଘରେ ପୂଜା

ଧନ୍ୟ ଧନ୍ୟ ଲୀଳାମୟୀ ସାଗର ତନୁଜା l

ସୁଖେ କରିଥାଆ ମାତ ଶ୍ରୀକ୍ଷେତ୍ରରେ ଘର

ଲୀଳାମୟୀ ମାଆକୁ ମୋ ଶତ ନମସ୍କାର l