ନୂଆ ଦିଗନ୍ତ

ତୁମେ ମୋତେ ଆଘାତ ଦେଇ ପାରିବ

ମୋ ମନକୁ ସେଇ ଘାତ ପ୍ରତିଘାତ ଭିତରେ

ଧନ୍ଦି ହେବା ପାଇଁ ବାଧ୍ୟ କରି ପାରିବ ନାହିଁ

ତୁମ ଦ୍ୱାରା ସୃଷ୍ଟ ପ୍ରତିଟି ବାଧା ପ୍ରତିବନ୍ଧକ

ମୋ ପାଇଁ ଆଗକୁ ବଢ଼ିବାର ପ୍ରେରଣା ସାଜିବ

ତୁମ ଦ୍ୱାରା ସୃଷ୍ଟ ପ୍ରତିଟି ତିକ୍ତ ଅନୁଭୂତି

ମୋର ଲେଖନୀରୁ କବିତାରେ ରୂପାନ୍ତରିତ ହେବ

ହଁ, ଫରକ ରହିବ।

ତୁମର ଆଉ ମୋ ଭିତରେ, ଏତିକି ରହିବ ଯେ

ତୁମେ ପୁରୁଷ ପ୍ରଧାନ ସମାଜର

ଅଭିନ୍ନ ଅଙ୍ଗ ବୋଲାଇବ,

ଆଉ ମୁଁ ସେ ସମାଜରେ ଅବହେଳିତ ନୁହେଁ

ସବୁ ବାଧାବିଘ୍ନକୁ ସାମ୍ନା କରି

ଆଗାମୀ ଭବିଷ୍ୟତ ପାଇଁ ପ୍ରେରଣା ସାଜିବି।

ନାରୀ ସଶକ୍ତିକରଣର ସ୍ଳୋଗାନ ଦେଇ ନୁହେଁ,

ବିପ୍ଳବିନୀ ସାଜି ସେଇ ତିକ୍ତ ଅନୁଭୂତି ସହିତ

ନିର୍ଯ୍ୟାତନା ଅମାରେ ପଛଘୁଞ୍ଚା ଦେଉଥିବା

ଅନେକ ନାରୀଙ୍କୁ ସମ୍ମାନର ଆଲୋକ ପଥରେ,

ଦିଗନ୍ତ ପର୍ଯ୍ୟନ୍ତ ବାଟ ଦେଖାଇ ଚାଲିବି।