ନଷ୍ଟସ୍ୟ କାନ୍ୟଗତି

ଭେଟିଲି ଦିନେ ମୁଁ ବାବାଜୀ ଜଣଙ୍କୁ

ଗେରୁଆ ବସନ ପିନ୍ଧା

ଲମ୍ବା ନିଶଦାଢି କପାଳେ ତିଳକ

ଜଟା ସବୁ ମୁଣ୍ଡେ ବନ୍ଧା

ବାବାଜୀ ହେଇକି ଠିଆ ହେଇଛନ୍ତି

କଂସେଇ ଦୋକାନ ପାଶେ

ପଚାରିଲି ବାବା ଏଠି କାହିଁ ଠିଆ

ହୋଇଅଛ କିବା ଆଶେ

ଅତି ସନ୍ତର୍ପଣେ ନରମ ଗଳାରେ

ବାବାଜୀ କହିଲେ ଶୁଣ

ମାଉଁସ ଟିକିଏ ଆଜି ନେବି ମୁହିଁ

କରିବା ଟିକେ ତୁଉଣ

ଚକିତ ହୋଇ ମୁଁ ପଚାରି ବସିଲି

ତୁମେ ପରା ସାଧୁ ଅଟ

ଶାଗୁଆତି ତୁଣ ଖାଇବାକୁ କିଆଁ

କର ହେ ବାବା ଅଝଟ

ମୁରୁକି ହସିଲେ ଦାନ୍ତକୁ ଦେଖେଇ

କହିଲେ ବାପା ତୁ ଶୁଣ

ମଦ ସାଙ୍ଗେ ଭାରି ସୁଆଦ ଲାଗଇ

ଥିଲେ ମାଉଁସ ଚାଖଣ

କହିଲି ତୁମେ ତ ଭଲବାବା ଜଣେ

ଖାଉଛ ମାଉଁସ ମଦ

କି କରିବି ବାବୁ ଗଣିକାଳୟରେ

ମଦ୍ୟ ମାଂସ ସିନା ସ୍ୱାଦ

ଚକିତେ କହିଲି ଖାଅ ମଦ ମାଂସ

ସଙ୍ଗେ ପୁଣି ବେଶ୍ୟା ପ୍ରୀତି

ମ୍ରିୟମାଣ ହୋଇ ବାବାଜୀ କହିଲେ

ନଷ୍ଟର କି ଅବା ଗତି