ନୋଟ୍ ଲଗେଇଛି ନାଟ

ପ୍ରଶ୍ନ ପତ୍ର ଦେଖି ତାଟେକା ହୋଇଗଲି

ପଡ଼ିଛି କବିତା ବିଷୟ ପୁଣି "ନୋଟ୍",

ନିର୍ବାଚନ ରାଲି ରେ ବୁଲି ବୁଲି ହେମା

ନୋଟ୍ ଦେଇ ଗୋଟେଇଛୁ ବହୁ ଭୋଟ୍ ।

ସତରେ ନୋଟ୍ ଲଗେଇଛି ନାଟ

ନୋଟ୍ ନଥିଲେ ଭୋଟ ମିଳୁନି

ସମ୍ପର୍କେ ନୋଟ୍ ପାଈଁ ପଡୁଛି ଫାଟ,

ପାଠ ପଢି ପିଲା ଫେଲ୍ ହୁଅନ୍ତି

ନୋଟ୍ ବଦଲେ ମିଳେ ସାର୍ଟିଫିକେଟ ।

ମେଧାବୀ ଯୁବକ ଚାକିରୀ ପାଉନି

କରୁଛି ସାଇକେଲ ମାର୍ଟ।

ଅପାଠୁଆ ତେଣେ ପାଏ ସରକାରୀ ଚାକିରୀ

ପକେଇ ବଣ୍ଡଲ ବଣ୍ଡଲ ନୋଟ୍ ।

ପୁଲିସ୍ ଠୁ ନେଇ ପ୍ରଶାସନ ଯାଏଁ 

ନୋଟ୍ ଦେଖିଲେ ଖୋଲାନ୍ତି ଗଳା ବାଟ,

ଠିକାଦାର ବିଲ୍ ରେ ନୋଟ୍ ବାଜିଲେ

ଯନ୍ତ୍ରୀ ମଞ୍ଜୁର କରନ୍ତି ଫଟାଫଟ ।

ଶବଦ ମିଳୁନି ନୋଟ୍ ବିଷୟେ ଲେଖିବାକୁ

ମନେ ଚିନ୍ତି ପାଞ୍ଚିଲି ଗୋଟେ ବାଟ,

ପରୀକ୍ଷା ଖାତାରେ ଶୀର୍ଷକ ଲେଖି 

ତଳେ ଯୋଖିଦେଲି ଗୋଟେ ସହେ ଟଙ୍କିଆ ନୋଟ୍ ।