ନନ୍ଦିଘୋଷେ ବିଜେ

ତିନି ଗୋଟି ରଥ ହୋଇଛି ପ୍ରସ୍ତୁତ

ସଜବାଜ ହୋଇ ବଡଦାଣ୍ଡରେ

ଆସିବ କାଳିଆ ଆସିବ ବଳିଆ

ସୁଭଦ୍ରା ଆସିବେ ଯାତ୍ରା ପାଇଁରେ ll

ନବଦିନ ଯାତ୍ରା ପାଇଁ ସାଜସଜା

ଭ୍ରମଣ କରିବେ କଳା ଠାକୁର

ଗୁଣ୍ଡିଚା ମନ୍ଦିରେ ଜନମ ବେଦୀରେ

ଦେବେଟି ଦର୍ଶନ ଜଗଦ୍ଦୀଶ୍ଵର ll

ନନ୍ଦିଘୋଷ ରଥେ ବସି ଜଗନ୍ନାଥେ

ବଡଦାଣ୍ଡେ ଯିବେ ଗହଳି କରି

ଦେବତା ଦାନଵ ଦେଖିବେ ମାନବ

ଅପୂର୍ବ ଲୀଳାକୁ ମନକୁ ଭରୀ ll

ଟାହିଆ ହଲାଇ ପହଣ୍ଡି ପକାଇ

କାଳିଆ ଆସିବ ରଥକୁ ଧାଇଁ

ମୁରୁକି ହସିବ କଣେଇ ଚାହିଁବ

ମନ ମୋହିନେବ ଜଗତ ସାଇଁ ll

ଭାବର ଠାକୁର ଭକ୍ତକୁ ନିଜର

ଦେଖି ଆସେ ଦାଣ୍ଡେ ଦେଇ ଆଶିଷ

ରଥ ପରେ ଜଗା କରିଲେ ଦର୍ଶନ

ମିଳେ କୋଟି ପୁଣ୍ୟ ମିଳେ ସନ୍ତୋଷ ।।