ନନ୍ଦ ପୁଅ ନଟନାଗର

ସେତ ଦେବକୀ ନନ୍ଦନ  ପ୍ରାଣ ଯଶୋଦାର ଧନ

ଘୋର ଅନ୍ଧକାରେ ଯାତ ଉଜ୍ଜ୍ୱଳ ଚାନ୍ଦ

ସପ୍ତ ଦ୍ଵାର କାରାଗାର ଖୋଲେ ଶିକୁଳି ଲୁହାର

ଗୋପ ଗଲ ତୁମେ ହୋଇ ନନ୍ଦର ନନ୍ଦ

ନନ୍ଦ ପୁଅ ନଟ ନାଗର

ନାଟ ହାଟ ଲୀଳା କଲ ଅଲୌକିକର ll

ପୁତନା ବଗା ଅସୁର  ବଧିଲ ଅନେକ ବୀର

ସ୍ମିତ ହାସ୍ୟ କର ତୁମେ ରଙ୍ଗ ଅଧରେ

ସାଜିଲ ଲବଣୀ ଚୋର ଖାଇଲ ଲହୁଣୀ କ୍ଷୀର

ଭାଙ୍ଗିଲ ଦହି ମାଠିଆ ଗୋପର ପୁରେ 

ନନ୍ଦ ପୁଅ ନଟ ନାଗର

ନାନା ଅଭିଯୋଗ ଆସେ ଗୋପବାସୀ ର ll

ସାଙ୍ଗସାଥି ଗହଣରେ ଗାଈଗୋଠ ପଡିଆରେ

ଖେଳ କୁଦ ନାଚ କର ଯମୁନା କୂଳେ 

କରିକି ଦର୍ପ ଗଞ୍ଜନ କାଳୀୟ କଲ ଦଳନ 

ଗୋବର୍ଦ୍ଧନ ଗିରି ଟେକି ଟେକ ରଖିଲେ 

ନନ୍ଦ ପୁଅ ନଟ ନାଗର

ପାଟିରେ ଯଶୋଦା ଦେଖେ ଛବି ବିଶ୍ୱର ll

ରାଧା ପ୍ରେମେ ରାସ କଲ କୁଞ୍ଜବନେ ପ୍ରୀତି କଲ

ମୟୂର ଚୂଳିଆ କାହ୍ନା ଯେ ବଂଶୀଧର

କଦମ୍ବ ଯମୁନା ସାକ୍ଷୀ ଗୋପାଙ୍ଗନା ରାଧା ସଖି

ବସ୍ତ୍ର ଚୋରୀ କଲ ତୁମେ ଯେ ଚକ୍ରଧର

ନନ୍ଦ ପୁଅ ନଟ ନାଗର

ସଭିଙ୍କର ପ୍ରିୟ ଥିଲ ତୁମେ ଠାକୁର ll