ନନାଙ୍କ ଚରଣେ
ନନାଙ୍କ ଚରଣେ
ମିଛି ମିଛିକା
ବୋଉର ସଂସାର କହିଦେଇ
ଖରାବର୍ଷାରେ ଆମ ଖୁସିପାଇଁ
ତିଆରୁ ଥିଲ ଛାତ !
ଆମେ ସବୁ ଶୋଇଗଲା ପରେ
ଲୁଚି ଲୁଚି
ଆମ କପାଳରେ ସ୍ନେହରେ
ବୁଲାଇ ଦେଉଥିଲ ତୁମର ସେ
ଅଭୟଭରା ହାତ ।
ମୋ ଗାଡ଼ି ପାଇଁ
ପେଟ୍ରୋଲ ପଇସା ସଞ୍ଚିରଖି
ସାଇକେଲର ଘୁରିବୁଲି
ଘରର ସମସ୍ତ ଜଞ୍ଜାଳକୁ
ଯୁଝୁଥିଲ ନା ତୁମେ !
ଅଗଣାରେ ଶୋଇ
ଖବରକାଗଜ ପଢ଼ିବା ବାହାନାରେ
ନିଜ କଷ୍ଟ ଓ ଦୁଃଖକୁ
ଲୁଚାଇ ରଖିବା କଳାରେ
କେତେ ଥିଲ ନିପୂଣ
ସେଥିପାଇଁ ହୁଏ ତ
ତୁମ ଶବ୍ଦକୋଷରେ ନା ଥିଲା
ବିଶ୍ରାମ ଭଳି ଶବ୍ଦର ସ୍ଥାନ ।
ପୁତ୍ର ଭାବେ ଏହି ଦୁନିଆରେ
ମୁଁ ପାଇଛି ପରିଚୟ
ତୁମରି ଆଶିଷ ବଳେ
ପ୍ରତିକ୍ଷେତ୍ରେ ଲଭିଛି ବିଜୟ
ତୁମେ ଅନ୍ନଦାତା
ତୁମେ ଗୁରୁପିତା
ବିପଦେ ଆପଦେ ରହିଅଛ ସଦା
ହୋଇ ଆମ ରକ୍ଷାକର୍ତ୍ତା ।
ଜୀବନ ସଂଗ୍ରାମେ
ପିତା ନାମେ ତୁମେ
ଅବତୀର୍ଣ୍ଣ ଧରାପୃଷ୍ଠେ
ତୁମର ସେ ଉଦାରତା
ମହନୀୟ ରୂପ
ଚାଲିବାକୁ ଦିଏ
ଅସୀମ ଧୈର୍ଯ୍ୟ ଓ ଶକ୍ତି
ଚରଣେ ତୁମର କରୁଛି ପ୍ରଣାମ
ଘେନି ହୃଦୟରେ ଭକ୍ତି ।