ନିଷ୍ପେସିତର ବିଳାପ

ଗୋଟିଏ ମାଆର ସନ୍ତାନ ଆମେରେ

ସଭିଙ୍କର ସମ ଅଧିକାର

ଏକଥାକୁ କିଆଁ ନବୁଝି ମଣିଷ

ହେଉଅଛି ଏତେ ସ୍ବାର୍ଥପର

ଆନ ଚିନ୍ତା ନକରି ଅନ୍ତର

ଦେହ ସୁଖ ପାଇଁ ଅପରକୁ ଲୁଟି

ନିଷ୍ପେଷଣକୁ ଅଗ୍ରାଧିକାର ।

ଆର୍ଥିକ ଦୈହିକ ପୁଣି ମାନସିକ

ସହି ସହି କେତେ ଅତ୍ୟାଚାର 

ଯାତନା ଜୁଇରେ ସଢ଼ି ସଢ଼ି ନିତି

ଶୋଷିତ ହରାଏ ଅଧିକାର

ଜୀବନରେ ନାନା ହରବର

ନିଷ୍ପେସିତ ଭାବେ ଜୀଇଁ ରହିବାକୁ 

ସତେ କି ଲେଖିଛି ନାମ ତା'ର !

ହୀନ ଚକ୍ରାନ୍ତରେ ସତ ହୁଏ ମିଛ

ମିଛ ନେଇଥାଏ ସତ ରୂପ

ଅନ୍ୟାୟ ଅନୀତି ଚକ୍ରବ୍ୟୁହ ମଧ୍ୟେ

ନିଷ୍ପେସିତ କରଇ ବିଳାପ

ହଜାଇ ଦେଇ ଜୀବନ ଧୂପ

ସ୍ବାର୍ଥପର ଏହି ଦୁନିଆ ଭିତରେ

କାହା ସାଥେ କରିବ ଆଳାପ ?

ସୁଖଦୁଃଖ ବାଣ୍ଟି ଚଳିବା ପାଇଁକି

ଜନମ ଆମର ଏ ମରତେ

ଉଚିତ୍ ନୁହେଁ କି ଏକଥା ବୁଝିବା

ପ୍ରତ୍ୟେକ ମାନବ ହୃଦଗତେ ?

ମୟା ଦେହ ପାଇଁ ଲୋଭ ଏତେ

ଆନ କଷ୍ଟ ଦେଖି କଷ୍ଟ କି ମିଳେନି

ନିଜ ଅନ୍ତରକୁ କୁହ ସତେ ?