ନିରର୍ଥକ

ବୟସର ଅପରାହ୍ନେ

        ଅରଣ୍ୟ ରୋଦନ

ଅଫେରନ୍ତା ଅତୀତର

        ସ୍ମୃତି ରୋମନ୍ଥନ l

ଅଦିନ ଶ୍ରାବଣେ ଶୁଣି

        ପ୍ରେମର ପୂରବୀ

ହୃଦୟ ନିରସ ବନ

        ଅଶ୍ରୁରେ ପଲ୍ଲବୀ l

ନିଃସଙ୍ଗ ଜୀବନ ବିଧି

        ବିଚିତ୍ର ବିଧାନ

ରେଣୁମୟ ମରୁଭୂମେ

        ଅନିଳ ସନ୍ଧାନ l

ପ୍ରେମେ ପ୍ରତାରିତ ପ୍ରାଣ

        ମିଥ୍ୟା ଜାଣୁ ଜାଣୁ

ପ୍ରକମ୍ପିତ ବୃଥା ସ୍ନାୟୁ

        ଅଣୁ ପରମାଣୁ l

ଆକାଂକ୍ଷା ବିହୀନ ପ୍ରାଣ

        ପୁଣି ଆଶା ବାନ୍ଧେ

ହୃଦୟ ନିରାଶ ମିଥ୍ୟା

        ପାରିଜାତ ଗନ୍ଧେ l

ନିଷ୍ଫଳ ପ୍ରଚେଷ୍ଟା କଲେ 

         ଜୀବନଟା ଯାକ

ବିହେ ପ୍ରେମାନନ୍ଦ ପ୍ରାଣ

         ହେଲା ନିରର୍ଥକ l