ନିର୍ବାଣର ମନ୍ତ୍ର

ନିରଞ୍ଜନା ନୀର ଅନୁତାପ କରେ

କାହିଁ ଗଲ ତୁମେ ବୁଦ୍ଧ ,

"କାମନା ବିନାଶ " କାମନା ଜ୍ୱାଳାରେ

ଅବନୀ ଆଜି ଅଶୁଦ୍ଧ ।

ହଜାର ବର୍ଷର ହଜାର ସ୍ଳୋଗାନ

ସତ୍ତ୍ଵ ହରା ବୋଧିସତ୍ତ୍ଵ ,

ବିଫଳ ହୋଇଛି ହେ ମହା ପୁରୁଷ

ବୋଧିସତ୍ତ୍ଵର ମହତ୍ତ୍ଵ ।

ଅନୁଢ଼ା ବୟସ ଲୁଟିଛି ଅୟାସେ

କାମରେ କାମୁକ ଆଖି ,

ଭରା ଯଉବନେ ମୃତ୍ୟୁର କାରଣେ

ନିର୍ବାଣ ଖୋଜୁଛି ସାକ୍ଷୀ ।

ରାଜନୀତିର ଏ ପଶାପାଲି ଗୋଟି

ଚଳାଇ ଆଜି ଶକୁନି ,

ନିଜ ସ୍ବାର୍ଥ ପାଇଁ ନାରୀର ରକ୍ତରେ

ଭିଜୁଛି ଆଜି ଅବନୀ ।

ଯୌବନ ଆଜି ଅଭିଶପ୍ତ ସୃଷ୍ଟି

ବଟତର୍ପଣ କରେ ,

କାହିଁ ଲୁଚିଗଲ ହେ! ଗୌତମ ବୁଦ୍ଧ

ନିରଞ୍ଜନା ଆଜି ଝୁରେ ।

ନିର୍ବାଣ ତ ନୁହେଁ କୋଳରେ ଖେଳୁଛି

କୁଆଁରୀ ମାଆର ପିଲା ,

ଆଖି ଛଳଛଳେ ଖୋଜଇ ବିକଳେ

ବାପା କେଉଁଆଡ଼େ ଗଲା ।

ଆଶୀର୍ବାଦ ଅବା ଅଭିଶାପ ଇଏ

ପରାଜିତ ବାରମ୍ବାର ,

ଶତ ନିରଞ୍ଜନା ଆଖିର ଲୁହରେ 

ବୁଡ଼ିଛି ଆଜି ସଂସାର ।

ଶାନ୍ତି , ମମତ୍ତ୍ଵର ବାର୍ତ୍ତା ଲୁଚିଯାଏ

ଆଶାର ଆକାଶ ତଳେ ,

ଏ ଧରା ବକ୍ଷକୁ ଫେରିଦେଖ ଥରେ

ନିରଞ୍ଜନା ଆଖି ଜଳେ ।

ଗୌତମଙ୍କ ବାର୍ତ୍ତା ନିରଞ୍ଜନା ଖୋଜେ

କାହିଁ ଆଜି ଓମ୍ ଶାନ୍ତି ,

ବୁଦ୍ଧଙ୍କ ନିର୍ବାଣ ଯୁଗଜୟୀ ମନ୍ତ୍ର

ସଂସାରେ ଖୋଜୁଛି ମୁକ୍ତି ।

ସତ୍ୟମେବ ଜୟତେର ବିଶ୍ଵାସରେ

ନବମ ଈଶ୍ୱର ଥିଲ ,

ମୂର୍ତ୍ତି ଅଢ଼ୁଆଳେ ରୂପଶ୍ରୀ ଲୋତକେ

ହୃଦ ହୁଏ କଲବଲ ।

ଅଷ୍ଟ ମାର୍ଗ ଆଜି ନିର୍ବାଣର ମନ୍ତ୍ର 

କଳିରେ ତୁମ ଆୟୁଧ ,

ଚୋରି, ନାରୀ, ହତ୍ୟା ହିଂସା ମୂଳମନ୍ତ୍ର

ଫେରି ଦେଖ ଥରେ ବୁଦ୍ଧ ।