Library
Profile
ନିଖୋଜ ମୃତ୍ୟୁ
ନିଖୋଜ ମୃତ୍ୟୁ
ତୁମ ବିକଟାଳ ବ୍ୟକ୍ତିତ୍ଵର
ବିଷାକ୍ତ ଛାୟା ଆଗରେ
ମୃତ୍ୟୁ ମଧ୍ୟ ଭୟସିକ୍ତ
ଶୁଣି ତୁମ ଆଗମନର ବାର୍ତ୍ତା
ମୃତ୍ୟୁ ହୋଇଉଠିଛି ବ୍ୟତିବ୍ୟସ୍ତ
ମୃତ୍ୟୁ ବି ଅପ୍ରସ୍ତୁତ
ତୁମକୁ କୋଳେଇ ନେବା ନିମିତ୍ତ
କାହିଁକି ବା ତୁମକୁ
କୋଳାଗ୍ରତ କରିବ ସେ !
ତୁମେ କ'ଣ ସତରେ ମୃତ୍ୟୁର ଯୋଗ୍ୟ ?
ଅନେକ ଜୀବନକୁ
ନିଜ ପାଦ ତଳେ ଚାପି ରଖି
ନୀରବଚ୍ଛିନ୍ନ ଉନ୍ନତିର
ସ୍ଵାଦ ବାରିବା ପରେ
ତୁମେ ଆଜି ନିଃସ୍ଵ
ଥରେ ମନେ ପକାଇ ଦେଖ ତ
ତୁମେ ସିଏ ଥିଲ
ଯିଏ ଅନେକ ସମ୍ଭାବନାର ସ୍ରୋତକୁ
ଅଚିରେ ଉଜାଡ଼ି ଦେଇଛ
କେବଳ ନିଜ ଆତ୍ମଗର୍ବର ପୂର୍ତ୍ତି ନିମିତ୍ତ
ନିଜ କୃତ କର୍ମକୁ
ଲୁଚାଇବା ପାଇଁ
ଲଦି ଚାଲିଥିଲ
ଅନେକ ମିଥ୍ୟା ଆରୋପ ପ୍ରତ୍ୟାରୋପ
>
ତୁମ ପାଇଁ
କେତେ ଯେ ନିଷ୍ପାପ ଆଖି
ସାରା ରାତି ଉଜାଗର ରହି
ଝରାଇଛି ଲୁହ
ଆଜି ଯେବେ ତୁମେ
ନିଜ କୃତ କର୍ମର ଜାଲ ମଧ୍ୟରେ
ନିଜେ କବଳିତ
କାହିଁକି ହଜିଯାଇଛି ତୁମ
ଆତ୍ମବଡ଼ିମାର ଅହଙ୍କାର
ଯେଉଁ ରସନା ଦିନେ
ଅଶ୍ରାବ୍ୟ କଟୁ ବଚନ କହିବାରେ
ପ୍ରକାଶ କରୁ ନ ଥିଲା
ତିଳେ ମାତ୍ର ଦ୍ଵିଧା
ଆଜି ସେ ମୁଖରୁ ଶୁଣା ଯାଉଛି
ମୃତ୍ୟୁଂଦେହିର କରୁଣ ସ୍ବର !
ତୁମ ପାପ କର୍ମର
ମାୟା ମରିଚୀକା ଆଗରେ
ଆଜି ହଜିଛି ମୃତ୍ୟୁ
ନିଖୋଜ ହୋଇଯାଇଛି ସେ
କେବଳ ତୁମ କୃତକର୍ମ ଭୟରେ
ମୃତ୍ୟୁ ମଧ୍ୟ ଦେଉଛି ଅଭିଶାପ
ହୋଇଯାଅ ତୁମେ
ଅନ୍ୟ ଜଣେ ଅଶ୍ଵତ୍ଥାମା
ଦ୍ବାରେ ଦ୍ବାରେ ଖୋଜିବୁଲ କେବଳ
ମୃତ୍ୟୁର ସ୍ପର୍ଶ
କିନ୍ତୁ ତୁମ ପାଇଁ ସର୍ବଦା
ନିଖୋଜ ହୋଇଯାଉ ମୃତ୍ୟୁ ।
