ନିଜ ଘରେ ବଇଦ

(ଘୋଡା ନାଚ ତାନରେ ଗାୟନ)

ଘର ବାଡି ଠାରୁ   ବନଲତା ଯାଏ

   ଔଷଧୀୟ ଗୁଣ ଭରା

ତରୁଣ ତୃଣ ଗୁଳ୍ମ   ଉପଚାର କଲେ

    ରୋଗ ଦୂର ହେବ ପରା !

ଶିରରେ ଶିରପା   ପାଦରେ ତଇଳ 

     ମରଦନ କରୁଥିଲେ

 ଯୋଗ ପ୍ରାଣାୟମ  ପ୍ରାତ ଭ୍ରମଣର

     ଅଭ୍ୟାସଟି ରଖିଥିଲେ ।

ତେଲ ମସଲାକୁ    ବରଜନ କରି

     ସବୁଜ ପରିବା ଖାଇ

ହସି ହସାଇବା    ଗୁଣ ରଖିଥିଲେ

    ବଇଦ ଜୁହାର ହୋଇ ।

ବିଶ୍ୱେ ଭାରତର  ଗୌରବ ସାଜିଛି

    ନିମ୍ବ ପତ୍ର ଆମ ପାଇଁ

ତାହା ଠାରୁ ବଳି  ମହୌଷଧି ଆଉ

   ଆନ ଦେଶେ ମିଳେ ନାହିଁ ।

ଆଦିମ ମଣିଷ   ପର୍ବତ ଜଙ୍ଗମ

    ଗଛ ଲତା ପୂଜୁଥିଲା 

ବିଜ୍ଞାନୀ ଓଡିଆ  ବିଶ୍ୱେ ବ୍ୟତିକ୍ରମ 

    ଦାରୁ ଦିଅଁ ପୂଜା କଲା। 

ଭାଇରାଲ୍ ଫିଭର  ଯେତେ ପରକାର

     ଅଣାୟତ୍ତ ହୋଇଯାଏ

ଅଦା ରସୁଣକୁ    ଗରମ ପାଣିରେ

    ପିଇଲେ ଦୂରରେ ରହେ ।

ଚଉଁରାରେ ଅଛି   ତୁଳସୀ ପତର

    ସକାଳୁ ଚାରିଟି ଖାଇ

କଫ ପିତ୍ତ ଜମା   ପାଖ ନ ମାଡିବ

    ଶର୍ଦ୍ଦି କାଶ ହେବ ନାହିଁ ।

କଟା ପୋଡା ଜଳା  ବିଶଲ୍ୟକରଣୀ

    ପତରକୁ ଲଗାଇଲେ

ଘୃତକୁମାରୀକୁ   ଚର୍ମରେ ଲେପିଲେ 

    ନାନା ରୋଗ ନାଶ କରେ ।

ଅମୃତଭଣ୍ଡାର   ପତର ସିଝାଇ

     ସେବନ ଯଦି କରିବ

ଡେଙ୍ଗୁ ଜ୍ୱର ଶୀଘ୍ର  ଭଲ ହୋଇଯିବ

     ପ୍ଲେଟଲେଟ୍ ବଢି ଯିବ ।

ବେଲ ପତ୍ରଟିଏ  ସକାଳୁ ଖାଇବ

    ହଟିବ ପେଟର ବ୍ୟଥା

ଆମାଶୟ ଗ୍ୟାସ୍  ଦୂରୁହ ବିମାରୀ

    ଲିଭିଯିବ ତାର ପତ୍ତା।

ପିଜୁଳି ପତ୍ରକୁ   ସିଝାଇ ପିଇବ

    ବାଡିରେ ଅଛି ଅମାପ

ଛୋଟପିଲା ଠାରୁ  ପ୍ରୌଢ ପ୍ରାଜ୍ଞ ବୃଦ୍ଧ

    ନ ଦେଖିବ ରକ୍ତଚାପ ।

ଅବସାଦ ରୋଗେ  ନିଦ ହୁଏନାହିଁ

    ରାତି ପାହେ ଲାଗେ ଥକା

ଛୋଟ କଥାଟିଏ  ଯତନେ କରିଲେ 

    ନିଦର ନଥିବ ଦକା। 

ପାଚିଲା କଦଳୀ  ଚୋପାକୁ କାଟିଣ

    ସିଝାଇ ରଖିବ ଛାଣି

ରାତ୍ର ଭୋଜ ପରେ  ପିଇଲେ ସିଝାକୁ

    ନିଦରେ ଘୁଙ୍ଗୁଡି ଟାଣି ।

କରଞ୍ଜ ପତର   ସିଝା ଖାଲି ପେଟେ

    ଯକୃତକୁ ମିଳେ ବଳ

କାମଳ ବିମାରି  ଦୂରେ ପଳାଇବ

   ଜୀଇଁ ବ ଟି ଦୀର୍ଘ କାଳ।

କଲେ ନିଶା ପାନ  ସର୍ବ ସାଧାରଣ

    କରନ୍ତି ଯେ ପରିହାସ

ବଦଭ୍ୟାସ ଟିକୁ   ଛଡାଇବା ପାଇଁ 

    ପିଅ ଦୁବ ଘାସ ରସ ।

ସବୁଠାରୁ ଭଲ  ଥାଲକୁଡ଼ି ପତ୍ର 

   ତାକୁ ନଭୁଲିବ କେବେ

ପ୍ରତହ୍ୟ ତାହାକୁ  ସେବନ କରିଲେ 

  ସର୍ବ ବ୍ୟାଧି ଦୂରେ ଯିବେ l 

ଥାଲକୁଡ଼ି ପତ୍ର   ଅମୋଘ ଔଷଧି  

   ପେଟ ରୋଗ ନାଶ କରେ

ପେଟରୋଗ ଯଦି ଦୂର ହୋଇଗଲା 

   ଆଉ କେଉଁ ରୋଗ ଧରେ !

ଚରକଙ୍କ ବାଣୀ   ଔଷଧୀୟ ଗୁଣ

    ରହିଛି ପ୍ରତ୍ୟେକ ଗଛେ

ଘର ବଇଦକୁ   ଅଣଦେଖା କରି

    ଧାଇଁବା ଡାକ୍ତର ପଛେ !