ନୀରବ ପ୍ରଶ୍ନ

ମନରେ ଅଜଣା ଡରର ବୁଢିଆଣୀ

ଜାଲରେ ଛଟପଟ ହୋଇଯାଏ

ଛୋଟିଆ ପ୍ରାଣ ପିଣ୍ଡଟି

କୋକୁଆ ଭୟର ଶକ୍ତ ରଜ୍ଜୁ ବନ୍ଧନରେ

ବିତସ୍ପୃହ ହୋଇ କହି ଉଠେ

ଏ କଣ ଜୀବନର ଅର୍ଥ?

ଏ କଣ ଜିଇଁବାର ଉଦ୍ଦେଶ୍ୟ?

ଯଦି ଉତ୍ତର ଆସେ ନା...

ତାହେଲେ ଆଉ କିଛି ପ୍ରଶ୍ନ

କିଏ ଏ ଅଦେଖା ଆତତାୟୀ

କିଏ ଏ ଅଦୃଶ୍ୟ ଆତଙ୍କୀ?

ହୁଏତ ସଭିଏଁ ନିରୁତ୍ତର!

ଭୀତି ଆଉ ମତି ଉଭୟ

ଆଜି ସେ ଡର ପାଖେ ନତମସ୍ତକ।

ବାସ୍ ଏତିକି ବୁଝିଯାଏ ଏ ଆତ୍ମା

ସାମାଜିକ ଦୂରତ୍ଵ ଏହାର ମିମାଂସା

ହେଲେ ଯେଉଁଠି ମନର ଦୂରତା

ଯେଉଁଠି ହୃଦୟର ଦୂରତା

ଯେଉଁଠି ସମ୍ପର୍କରେ ଦୂରତା ତିଷ୍ଠି ରହିଛି ।

ସେଠାରେ ଏ ସାମାଜିକ 

ଦୂରତା ପୁଣି ଆସିଲା କୁଆଡୁ?

ଏ ଆତତାୟୀ କଣ ଏକ ବାହାନା

ଏ ଆତଙ୍କ କଣ ଏକ ଛଳନା?

ଯଦି ହଁ ତେବେ ଏହା ମିମାଂସିତ 

ହେଉନାହିଁ କାହିଁକି?

ଶେଷରେ ଗୋଟିଏ ଉତ୍ତର ମନକୁ

ସମ୍ଭାଳି ନିଏ ସବୁରି ମୂଳରେ ସଂଯମତା।