ନୀଳ କଇଁ

ଅଙ୍ଗାରେ ଗାର ପକେଇ

ଜହ୍ନ କାଟେ

ପୋଖରୀରେ ଗାର

ସ୍ୱପ୍ନ ସବୁ ଖସି ଯାଆନ୍ତି

ବୟସର ଚହଲା ଢେଉରେ

ନିରେଖି ପାଣିରେ

ଖୋଜେ କଢ଼ ଏକ

ନୀଳ କଇଁ।

ଲାଗୁଛି ଏଇ ରାତି ବୋଧେ ପାହିଯିବ

ସବୁ କିନ୍ତୁ ଅଧା

ବହଳ କୁହୁଡି

ଚିରା କମ୍ବଳ ଟା

ତଥାପି ଛାଡିବାକୁ ମନ ନାଇଁ ତାର

ହାଇ ପରେ ହାଇ

ସ୍ୱପ୍ନ ସବୁ ଗଦା ମଡା

ତକିଆ ଖୋଳରେ ବାକିଆ ନିଦ।

ଅନ୍ଧାରେ ତ ସବୁ ଦିଶୁଥିଲା

ଦିନର ଆଲୁଏ

କିଛି ତ ଦିଶୁନି

ସୂର୍ଯ୍ୟ କଣ ଅନ୍ଧାର ବୁଣୁଛନ୍ତି

ଅବା ମୁଁ ଅନ୍ଧ

ହାଏ ! ଲାଲ କଇଁ

ଖୋଜିଲି ନୀଳ କଇଁ ପ୍ରେମ ।