ନୀଡହଜା

ନଇଁଗଲା ସଂଜ ହେଲେ ନୀଡହରା ଫେରିଲାନି ନୀଡେ

ବାହୁନୁଛି କଇଁ ବସି ମୁକୁଳିତ ମ୍ଳାନ ଅଭିସାରେ

ବାହୁନୁଛି କପୋତଟା ଉଠ୍ ପୁତା ପୁରିଲାଣି ମାଣ

ସେରକ ପୁରିଲା ହେଲେ ଉଠିଲାନି , ଶୁଣିଲାନି ରାଣ ।

ତାଳବଣେ ରହିରହି ଶୁଭୁଥିଲା  ନୀରବ ବିଳାପ

ଥମିଥିଲା ଝଡ ,ସ୍ଥିରଥିଲା ଭୂଲୁଣ୍ଠିତ ତୁଳୀର ତଳପ

ଅଶନିର ଶବ୍ଦସବୁ ମିଶିଥିଲା ଶୂନ୍ୟେ ମହାଶୂନ୍ୟେ

 କ୍ରନ୍ଦନ ଲହରୀ ହଜି ଲୀନଥିଲା ତମସା ଅରଣ୍ୟେ ।

ଚକ୍ରବାକ ଚାହିଁଥିଲା ରହି କରି ଶୂନ୍ୟକୁ ପ୍ରତୀକ୍ଷା

ଅନ୍ତରୀକ୍ଷୁ ଶୁଭିବକି କିଛି ଶୂନ୍ୟହସ୍ତେ ଭରି ଭିକ୍ଷା

ଉଠିଲାନି ଅଭିମନ୍ୟୁ ହସୁଥିଲା ନିୟତି ବିଜନେ

ଚକ୍ରବ୍ୟୁହ ଭାଜିଥିଲା ଜଳୁଥିବା ଚିତା ଲେଲିହାନେ ।

କିଏସେ ଦେବ ଉତ୍ତର ମହାରଥି ଫେରିବକି ନାହିଁ

ନୀଡହରା ନୀରବରେ ବିଶ୍ରମିଲା କାହିଁ ଯାଇ ରହି ।