ଭାବାବେଶ

ଭାବର ସହର ଅଭାବ ଏଇଠି ଆବେଗ ହେଲାଣି ଊଣା

ମୁଖରେ ଅମୃତ ପେଟେ ଭରି ବିଷ ବାଣୀ କହି ମନଜିଣା ।

ତିନି ତୁଣ୍ଡେ ଛେଳି କୁକୁର ହେଉଛି ଭକୁଆ ବନୁଛି ସାଧୁ

ଦଣ୍ଡିକିରୀ ମାଛ ବିକା ସରିଯାଏ ମୁଖରେ ଭରି ଯେ ମଧୁ ।

ସୁବର୍ଣ୍ଣ କାନ୍ଦଇ ମଥା କୋଡି ଏଠି ବେଙ୍ଗି ହୋଇଲାଣି ସୁନା 

ଭାବର ସହର ଅଭାବ ଏଇଠି ଆବେଗ ହେଲାଣି ଊଣା ।

ମାଙ୍କଡ଼ ହାତରେ ଶାଳଗ୍ରାମ ଆଉ ପେଚାକୁ ସୁନା ପଞ୍ଜୁରୀ

ଶୋଭା କି ପାଇବ ଅଭିନୟେ ଭରା ହେଉଛି ସଂସାର ତରୀ ।

ମଥାରେ ଥିଲେ ତ ସୁବର୍ଣ୍ଣ କଳସ ମାର୍ଜାର ବନଇ ବାଘ

କେଶରୀ ହରାଏ ଦୁର୍ଭାଗ୍ୟେ ତା ଟାଣ ହୁଅଇ ଅଚିରେ ଛାଗ ।

ଛିଡିଯିବା ତାର ସାତସୁର ଧରେ କୁହାମୁଣ୍ଡା ଧରେ ବୀଣା

ମୁଖରେ ଅମୃତ ପେଟେ ଭରି ବିଷ ବାଣୀ କହି ମନଜିଣା ।

ଭାବଡୋରେ ଲାଗେ ଦିନୁ ଦିନ ନିଆଁ ଅଭାବୀ ଯାଉଛି ଡୁବି

ମଳିନ ପଡୁଛି ନାଲି ଅରୁଣିମା ସ୍ଵର୍ଣ୍ଣାଭ ଛବିଳ ରବି ।