ପ୍ରତିଶ୍ରୁତି

ଜହ୍ନକୁ ମାଗିଲି ଚେନାଏ ହସ ମୁଁ

   ହସିଦେଇ ଚାଲିଗଲା

ରାତିକୁ ମାଗିଲି ମୁଠାଏ ସପନ

   ସକାଳ ସଅଳ ହେଲା ।

ଫୁଲକୁ ମାଗିଲି କୋମଳତା ଟିକେ

   ରଙ୍ଗେଇବା ପାଇଁ ଦେହ

ମୁଡୁକି ହସି ସେ ମୁହଁ ମୋଡିଦଲା

  ସମ୍ଭାଳି ନ ହେଲା କୋହ ।

ପକ୍ଷୀକୁ ମାଗିଲି ଅନନ୍ତ ଆକାଶୁ

  ଟିକିଏ ଅଳପ ଥାନ

ଉଡିଗଲା କେଉଁ ଘୋର ବନସ୍ତରେ

  ନ ଦେଇ ତାହାକୁ ଧ୍ୟାନ ।

ଆକାଶକୁ ଦିନେ ମାଗିଲି ବିସ୍ତୃତି 

 ହାତଟେକି ଲବେ ଦିଅ

ଚାହିଁଲାନି ଥରେ ପାତି ସେ ଶ୍ରବଣ

 ଭସାଉଛି ଭବ ସୁଅ ।

ସମୀରେ ମାଗିଲି ନିଃଶ୍ବାସ ଟିକିଏ

   ଛୁଇଁଦେଇ ଗଲା ଚାଲି

କହିଲା ସଧୀରେ ଶୟଳେ ସର୍ବଦା

  ରହିବାଟା ଯାଆ ଭୁଲି ।

ମାଗିଲି ଧରାକୁ ମାଟିରୂ ମୁଠିଏ

  ମୁଣ୍ଡରେ ବୋଳିବି ବୋଲି

କୋଳେଇ ନେଲା ସେ ଦେଇ ପ୍ରତିଶ୍ରୁତି

   ହୃଦୟ ଦରଜା ଖୋଲି ।

କହିଲା ସେ ମୋର ମଥାକୁ ଆଉଁସି

   ତୁ କି ମୋ ଠୁ ଭିନ୍ନ

ତୁ ମୋର ହୃଦ ଚନ୍ଦନ ପରା ଲୋ

  ତୁ ମୋ ପୁନେଇ ଜହ୍ନ ।

ବିଶାଳ ପଣତ ପାତି ଦେଇଅଛି

   ମୋ ଠାରୁ କଲି ସର୍ଜନ

ଝରିଯିବୁ ଯେବେ କୋଳେ ତୋଳି ନେବି

    ଦେଖୁଥା' ମିଠା ସପନ ।