ନଈ ଆରପାଖେ ପ୍ରିୟା ଘର
ନଈ ଆରପାଖେ ପ୍ରିୟା ଘର
ନଈ ଆରପାଖେ ତୁମ ଗାଆଁ ଗୋରୀ
ନଈ ଏପାଖରେ ଗାଆଁ ମୋର
ଦୁଇ ଗାଁ ମଝିରେ ଅଙ୍କାବଙ୍କା ନଈ
ଚିର ସ୍ରୋତସ୍ବିନୀ ଜଳଧାର ।
ନଈ ଏପାଖରୁ ନିରୀଖି ଚାହିଁଲେ
ସୁନ୍ଦର ଦିଶଇ ତୁମ ଘର
ନଦୀଘାଟ ତୁମ ଦିଶେ ଅନୁପମ
ସ୍ନାନ ଯହିଁ କରେ ପ୍ରିୟା ମୋର ।
କାଗଜ ଡଙ୍ଗାରେ ତୁମ ନାଁ ଲେଖି
ଭସାଇଲି ଯେବେ ନଦୀଜଳେ
ଡଙ୍ଗା ଭାସିଗଲା ସ୍ମୃତି ହଜିଗଲା
ଲାଗିଲାନି ତାହା ଆରକୂଳେ ।
ଆଜି କାହିଁ ପ୍ରିୟା ତୁମ ଅଗଣାରେ
ବାଜିଲାଣି ଶୁଭ ସାହାନାଇ
ପାଦ ପାଉଁଜିର ରୁଣୁଝୁଣୁ ଶବ୍ଦ
ନଦୀଘାଟେ ଆଉ ଶୁଭୁ ନାହିଁ ।
ନଈବି ଝୁରୁଛି ଘାଟବି ଝୁରୁଛି
ଝୁରେ ବାଲି ତୁମ ପାଦଚିହ୍ନ
ନାଉରୀ ବାପୁଡା କାତ ଧରି ହାତେ
ଗୀତ ଗାଇ ଦେଖେ ଦିବା ସ୍ବପ୍ନ ।
ନଈଧାରେ ଆମ୍ବ ବଉଳ ଫୁଲରୁ
ମହମହ ବାସ ବାସିଲାଣି
କୋକିଳର ସ୍ବନ କୁହୁକହୁ ତାନ
ରହିରହି ଧୀରେ ଶୁଭିଲାଣି ।
ଫୁଲ ସବାରିରେ ବସି ତୁମେ ଯେବେ
ନଈ ଧାରେଧାରେ ଚାଲିଯିବ
ନଈ ଏପାରିର କଦମ୍ବ ବନକୁ
ଥରୁଟିଏ ହେଲେ ଚାହିଁଦେବ ।
ବିଜନ ବେଳାରେ ବିଜନର ବଂଶୀ
ଆଉ ଶୁଭିବନି ମଧୁସ୍ବନ
ନଈର ସୁଅରେ ଭସେଇ ମୁଁ ଦେବି
ଭଗ୍ନ ହୃଦୟର ସ୍ମୃତି ଚିହ୍ନ ।