ନିଆରା ସ୍ବପ୍ନ
ନିଆରା ସ୍ବପ୍ନ
ମନ୍ଦ ସମୀରଣେ ତନ୍ଦ୍ରିତ ନୟନେ
ଦେଖେ ମୁଁ ନିଆରା ସ୍ବପ୍ନ
ତନ୍ମୟୀ ତନୟା ଅଭିମାନୀ ପ୍ରିୟା
କିଣି ନିଏ ମୋର ମନ ।
ଝୁମିଝୁମି ଯେବେ ଛୁଇଁଛୁଇଁ ଯାଏ
ମେଘପୁଷ୍ପ ଯାଏ ଝରି
ଭିଜିଭିଜି ତହିଁ ଭିଜାଏ ହୃଦୟ
ପ୍ରୀତିର ପସରା ମେଲି ।
ଭିଜା ସପନରେ ସ୍ବପ୍ନର ନାୟିକା
ଚୁମି ଯାଏ ଯେବେ ଧୀରେ
ଗୋଲାପ ବନରେ ଲାଗିଯାଏ ନିଆଁ
ପ୍ରୀତି କାଦମ୍ବରୀ ଝରେ ।
ଉଛୁଳା ନଈରେ ଉଛଳିତ ନୀରେ
ଉଛୁଳେ ପ୍ରୀତି ଜୁଆର
ତନ୍ଦ୍ରାଶୀଳ ମନେ ଭାବେ ଅନୁକ୍ଷଣେ
ଗୁନ୍ଥିବାକୁ ପ୍ରୀତିହାର ।
ମନର ମିତଣୀ ରୂପସୀ ମାନିନୀ
ମେଘ ପାଲିଙ୍କିରେ ବସି
ଚାଲିଯିବ ପୁଣି ମେଘ ରାଇଜକୁ
ଅଙ୍ଗେ ପ୍ରୀତିରଙ୍ଗ ଲେସି ।
ସପନ ସୁନ୍ଦରୀ ସପନରେ ଆସି
ସପନରେ ଗଲା ଚାଲି
ନିଆରା ସ୍ବପ୍ନ ମୋ'ଅଧୁରା ହେଲେବି
ପାରେ ନାହିଁ ଜମା ଭୁଲି ।