💫ନଡ଼ିଆ ଭୂତ 💫

ଭୂତ ନାଁ ଶୁଣିଲେ କିଏ ବା ନ ଡରେ

ଛାତିରେ ପଶେ ଛନକା

ନିଦ ହଜି ଯାଏ ଆଖି ଦେଖୁଥାଏ

ରୂପ ତା ମିଛି ମିଛିକା ।

ଭାରି ଦୁଷ୍ଟ ପିଲା ସନିଆଁ ବେହେରା

ହଷ୍ଟେଲରେ ରହୁଥାଏ

ଆମ୍ବ କି ପିଜୁଳି ନଡ଼ିଆକୁ ତୋଳି

ସାଙ୍ଗ ସାଥି ମେଳେ ଖାଏ ।

ଦିନେ ସେ ରାତ୍ରିରେ ଚଢ଼ିଲା ଗଛରେ

ନଡ଼ିଆ ତୋଳିବା ପାଇଁ

ନଡ଼ିଆ ପାଖକୁ ଥାଏ କେଇ ହାତ

ଦେହ ମାରିଗଲା ଝାଇଁ ।

ଦେଖିଲା ଗଛରେ ବସିଛି କନ୍ଦାରେ

ବଦମାସ୍ ଭୂତ କାମ

ଆଗକୁ ଆଉ ସେ ଯିବାପାଇଁ କେବେ

ବଳାଇଲାନି ତା ମନ ।

ଭାବିଲା ସେଇଠି ବୃଥା ହୋଇଲାଟି

ଏତେ ପରିଶ୍ରମ ଫଳ

ଏତେ ବେଳେ ଝରେ ଗଛର କନ୍ଦାରୁ

ପାଣି ଧାର ଝର ଝର ।

ପାଟିରେ ପଡ଼ିଲା ଲୁଣିଆଁ ଲାଗିଲା

ଭାବିଲା ମନରେ ସିନା

ନଡ଼ିଆ ଭୂତଟା ଗଛରେ ବସିଛି

ମୁତି ଦେଲା ଚର୍ କିନା ।

ହାତ ତା ଥରିଲା ଗୋଡ଼ଟା ଥରିଲା

ସର୍ କିନା ଗଲା ଖସି

ଗୋଡ଼ ହାତ ତାର ଖଣ୍ଡିଆ ଖାବରା

ହଷ୍ଟେଲେ ବସିଲା ଆସି ।

ନଡ଼ିଆ କନ୍ଦାରେ ଆଉ ଏକ ଚୋର

ଟୁନିଆଁ ବୋଲି ପିଲାଟି

ଗଛେ ଚଢ଼ୁ ଥିବା ଭୂତକୁ ଦେଖି ସେ

ଭୟେ ପକାଇଲା ମୁତି ।

କିଛି କ୍ଷଣ କରେ ଦେଖିଲା ସେଠାରେ 

ଭୂତ ଗଲାଣି ଉଭେଇ

ଭୟରେ ଓହ୍ଲାଇ ହଷ୍ଟେଲରେ ଯାଇ

ଦେଖି ଆଶ୍ଚର୍ଯ୍ୟ ହୁଅଇ ।

⁸

ସନିଆଁ ଦେଖିଛି ଟୁନିଆଁ ଦେଖିଛି

ଦୁହେଁ ନଡ଼ିଆ ଭୂତକୁ

ନଡ଼ିଆ ଭୂତଟି ଆଉ କେ ନୁହନ୍ତି

ଦେଖନ୍ତି ନିଜେ ନିଜକୁ ।