ନବ ବଧୁର ସ୍ବପ୍ନ
ନବ ବଧୁର ସ୍ବପ୍ନ
ନାଲି ସିନ୍ଦୁରକୁ ରୂପା ପାଉଁଜି
ନାଲି ଶଙ୍ଖା ପିନ୍ଧି ବହୁଟେ ସାଜି ।
ସପନ ଦେଖଇ ଖୋଲା ଆଖିରେ
ହସି ଖେଳି କୁହେ ସଖୀ ସାଥୀରେ ।
ଆସିବ ସତେକି ରାଜ କୁମାର
ଘୋଡା ଚଢ଼ି ନେଇ ପ୍ରେମ ସମ୍ଭାର ।
ବିବାହ ବେଦୀରେ ତାକୁ ବସେଇ
ଉଡ଼ିଯିବ ଦୂର ଦେଶକୁ ସେହି ।
ଦେଖେ ସେ ସପନ ସୁନେଲି ଜହ୍ନ
ଆସି କରିବ ତା ମାନ ଭଞ୍ଜନ ।
ଧୀର କରି ଯେବେ ସେ ଟିକେ ଋଷିବ
ତା ବର ଆସିକି ହସେଇ ଦେବ ।
ଆଣିବ ତା ପାଇଁ କେତେ ଦରବ
ତା ପାଇଁ ତାହାର ହେବ ଗରଵ ।
ତା ନାମରେ ସେ ଯେ ହୋଇବ ନାମ୍ନୀ
ତା ପ୍ରେମ ବଳରେ ହେବ ସେ ଧନୀ ।
ଶାଶୁଘର ଯେବେ ସେ ଚାଲିଯିବ
ପଛରେ ତା ଘର ତ ରହିଯିବl ।
ମା ବାପା ବନ୍ଧୁ ଓ ଭାଇ ଭଉଣୀ
ଛାଡ଼ି ସେ ସାଜିବ ଯେ ବହୁରାଣୀ ।
କେତେ ସପନ ତା ପାଇଁ ସଜେଇ
ସମସ୍ତେ ଅଛନ୍ତି ଆଗକୁ ଚାହିଁ ।
ବରବେଶ ନେଇ ଆସିବ କିଏ
ତା ପାଇଁ ଜନମ ନେଇଛି ଯିଏ ।
ଗଭାରେ ଖୋଷିବ ସେ ମଲ୍ଲିଫୁଲ
ସ୍ବାମୀ ସୋହାଗିନି କହିବେ ସକଳ ।
ପାଦରେ ନାଇବ ସରୁ ଅଳତା
ବୋହୂ ସାଜିଯିବ ସେହି ଦୁହିତା ।
ଏନ୍ତୁଡ଼ି ରହିବ ପଛରେ ଚାହିଁ
ଆର ଜନମକୁ ଆସିବା ପାଇଁ ।
କଥା ଦେଇ ସେ ଯେ ପର ହୋଇବ
ଶାଶୁଘରୁ କୋକେଇରେ ସେ ଯିବ ।