ମୁନୀର ଅନଲାଇନ୍ ଶିକ୍ଷା

କାନ୍ଦି କାନ୍ଦି ମୁନୀ  ବାପା ପାଖେ କହେ 

    କେମିତି ପଢିବି ପାଠ    

କରୋନା ଭୂତାଣୁ  କାୟା ବିସ୍ତାରୁଛି

    ଭୟେ ହୁଏ ଛଟପଟ ll

ସ୍କୁଲ ତାଲା ଅବା  କରୋନା ସେଣ୍ଟର 

    ପଢା ହେଉ ନାହିଁ ସେଠି 

ଘରେ ବସି ବସି  ମୋବାଇଲ ଧରି 

    କେମିତି ପଢିବି ଏଠି ll

     

ଗୁରୁଜୀ ଗୁରୁମା କଥା ଶୁଭୁନାହିଁ 

    ରହେନି ଇଣ୍ଟରନେଟ 

ମୋବାଇଲ ଧରି ଅନ ଲାଇନ୍ ରେ 

   ପଢି ହେଉ ନାହିଁ ପାଠ ll

    

ସାଙ୍ଗ ସାଥି ମେଳେ  ଖେଳୁ ନାହିଁ ଖେଳ 

    ଘରେ ରହି ମୁଣ୍ଡ ବ୍ୟଥା 

ମାଆ ତ ରୋଷେଇ କରେ ଦିନ ରାତି 

   ହୁଏନି ମୋ ସାଥେ କଥା ll

    

ପଡିଶା ଘରର ଦୁଆର କବାଟ 

    ଖୋଲା ନାହିଁ କେତେବେଳେ 

ଏକାପରି ଲାଗେ  ଘରେ ଦିନ ରାତି 

    ସଞ୍ଜ ହେଉ କି ସକାଳେ ll 

     

ନିତି ମୋବାଇଲ  ଦେଖି ଦେଖି ମୋର 

    ଆଖିରେ ବଢଇ ଚାପ 

କରୋନା ଭୂତାଣୁ ମହାମାରୀ ସାଜି

     ବିଶ୍ବେ ଦିଏ ଅଭିଶାପ ll

      

ବଡ ହେଲେ ନିଶ୍ଚେ  ଡାକ୍ତର ହୋଇବି 

     କରୋନା କରିବି ଦୂର 

କେତେ ନୂଆ ଟୀକା  ତିଆର କରିବି 

    ନ ହୋଇବ ରୋଗ ଜ୍ବର ll