ମୁଁ
ମୁଁ
ବିସ୍ତୃତ ଦୁନିଆ ଭିତରୁ
ନିଜକୁ ସଙ୍କୁଚିତ କରି
ଏକଦମ୍ ନିଜ ପାଖରେ
ବିନ୍ଦୁଟିଏ କରି ରଖିବାକୁ
ବେଳେ ବେଳେ
ଭାରି ଇଚ୍ଛା ହୁଏ,
ନିଜ ଭିତରେ ନିଜକୁ
ଖୁବ୍ ଚିହ୍ନିବାକୁ
ମନଟା ବିକଳ ହୁଏ ।
ଏତେବଡ ପୃଥିବୀରେ
ନିଜର ନକ୍ସାକୁ
ଚିହ୍ନଟ କରିବାକୁ
ଏକ ଭିନ୍ନ ଦୁନିଆ
ମତେ ହାତଠାରି ଡାକେ,
ହେଲେ ମୁଁ କୋଉ ଯାଇପାରେ ।
ମୋ ମନ ଭିତରେ
ସେ ଦୁନିଆର ଛବିକୁ
ମୁଁ ବାରମ୍ବାର ଆଙ୍କୁଥାଏ,
ସେ ଦୁନିଆ
ସତରେ ଖୁବ୍ ନିଆରା
ନା ସେଠି ଥାଏ
ଏ ପୃଥିବୀର ଲୋଭ ମୋହ ମାୟା
ଅବା ଅତୃପ୍ତ କାମନା......
କେବଳ ମୁଁ ହିଁ ମୁଁ
ଏଇ ମୁଁ ଭିତରେ ପୁଣି
କେତେ ବିରାଟତ୍ବ...........
ସତେ ଏ ବିରାଟ ପୃଥିବୀଟା
ଲୁଚିଯିବ ତା'ର
ଅସ୍ତିତ୍ବ ଭିତରେ ।।