ମୁଁ କିଏ ତୁମର

ମୁଁ କିଏ ତୁମର, ମୋ ପାଇଁ କାହିଁ ତୁମ ହୃଦୟ ଅଧୀର

ମୋ ମଳିନ ଚେହେରା ରେ ହସ ଆଣିବାକୁ କାହିଁ ତୁମେ ଆତୁର ।।

ମୁଁ କିଏ ତୁମର, କାହିଁ ମୋତେ ଦେଖି ହୃଦୟ ରୁ ହସିଦିଅ

କେବେ ସତ୍ୟ କୁ ମୁହେଁ ବଖାଣିନ, ଆଖି ରେ ସବୁ କହିଦି ଅ ।।

ମୁଁ କିଏ ତୁମର, କାହିଁ ଈର୍ଷାଳୁ ହୋଇ ଉଠେ ତୁମ ସେ ଦୁଇ ଆଖି,

ଯେବେ ଅନ୍ତରଙ୍ଗ ହେବାକୁ ଚେଷ୍ଟିତ ହୋଇ ଉଠନ୍ତି ମୋ ସଖୀ ।।

ମୁଁ କିଏ ତୁମର, କାହିଁ ଆଖିରେ କଜ୍ଜ୍ଜଳ, ମଥା ରେ ଦେଇ କଳା ଟିକିଲି,

ପ୍ରସାଧନ ହେଇ ପଚାର, କୁହ ନା ମୁଁ ସୁନ୍ଦର୍ ଦିଶୁଛି ନା ନାଇଁ ବୋଲି ।।

ମୁଁ କିଏ ତୁମର, କାହିଁ ଚୁମି ଦେଇ କୁହ,"ମୋତେ ଚୁମ୍ବନ ଭଲ ଲାଗେନା,"

ଅଜଣା ଉଦ୍ ବେଳନ ରେ ଉଦ୍ ବେଳିତ ହୋଇ ବି ତୁମକୁ ଉଦ୍ ବେଳନ ଭଲ ଲାଗେନା ।।

ମୁଁ କିଏ ତୁମର, ଚୋରି ଚୋରି ମୋତେ ଅନେଇ, ମୋ ସୁର ର ସାଜ ରାଗିଣୀ

କେତେଥର ନିଜ ହାତ ରେ ଆଉଁସିଛ ମୋ ସୁପ୍ତ ଲଲାଟ କୁ ନିଜେ ବି ଜାଣେନି।।

ମୁଁ କିଏ ତୁମର, କେବେ ନିଜକୁ ହାଲକା କରିନିଅ ଅଶ୍ରାବ୍ୟ କହି ମୋତେ,

କେବେ ସୁରା ରେ ଚୂର୍ ତୁମ ଅର୍ଧଜାଗ୍ରତ ମସ୍ତିଷ୍କ ଖୋଜୁଥାଏ ମୋ ଅବସ୍ଥିତି ସତେ ।।

ମୁଁ କିଏ ତୁମର, କାହିଁ ତୁମ ଖାଦ୍ୟ ରେ ସଦା ଭାଗ ବସାଏ ମୋ ଉଦର,

କାହିଁ ସେ ଉଦର କୁ ହସେଇବାକୁ ତୁମେ ହୋଇ ଉଠ କର୍ମତତ୍ପର।।

ମୁଁ କିଏ ତୁମର, କାହିଁ ଦୁଃଖ ବେଳେ ମୋତେ ନ ଦେଖିଲେ ହେଇ ଯାଅ ଦୁଃଖୀ,

କାହିଁ ଦେଖି ବିଶି ଆଙ୍ଗୁଳି କୁ ଦନ୍ତେ ଆଘାତ ଦିଅ ଲାଜ ର । ଓଢ଼ଣୀ ଢାଙ୍କି ।।

ମୁଁ କିଏ ତୁମର, କେବେ କାହିଁ ନିରୂପଣ କରନି ଏଇ ସମ୍ପର୍କ ର ସଂଜ୍ଞା,

କାହିଁ ମୋ ପ୍ରତି କଥା ମୋ ଖୁସି ପାଇଁ ମାନି ଚାଲ ନ' ହୋଇ ଅବଜ୍ଞା ।।

ଏଇ ପ୍ରଶ୍ନ ପଚାରୁଥିବି ଆଗକୁ ଅନେକ ବର୍ଷ,

ଦାନ୍ତ ବିହୁନେ ବି ଅମଳିନ ଥିବ ଏଇ ଅମୂଲ୍ୟ ହର୍ଷ ।।