ମଶାଣି ଭଙ୍ଗା ଦେଉଳ

ବୟସ ଅପନ୍ତରା ଅପରାହ୍ନରେ 

ନିରାଶା ଅନ୍ଧକାର ଭିତରେ

ଆଶା ସୂର୍ଯ୍ୟ ମଉଳିବା ସମୟରେ

ଅସ୍ତବ୍ୟସ୍ତ ହୁଏ ବିଶ୍ୱାସ ସଂସାରେ ।

ସ୍ୱାଭିମାନ ପାଇଁ ଅନେକ ଯନ୍ତ୍ରଣା

ଘୋର ସଂଘର୍ଷ କାହାଣୀ

କିଛି ଅପାସୋରା ସ୍ମୃତି ପୃଷ୍ଠାରେ

ଆଉ କିଛି ପରିତ୍ୟକ୍ତ ଭଗ୍ନ ଜୀବନୀ ।

ଜୀବନ ମୋଡ଼ ବଦଳାଇ ଦିଏ

ସତ୍ୟ ପଛର ମିଛ ଅଭିନୟ

ଦୋଷୀ ସାବ୍ୟସ୍ତ ନ ହୋଇ ଦଣ୍ଡ ଭୋଗେ

ପର କରି ଚାଲିଯାଏ ସମୟ ।

ଜୀବନ ଆଉ କେଇଘଡି ମୁହୂର୍ତ୍ତ 

ବଞ୍ଚିବା ପାଇଁ ଆଉ କିଛି କ୍ଷଣ ସଂଘର୍ଷ

ଜୀବନ ଯୁଦ୍ଧରେ ପରାସ୍ତ ହେବା ଯାଏଁ

ବଳି ପଡେ ପାଦେ ପାଦେ ହୁଏ ଶେଷ ।

ନାହିଁ ଅଭିଯୋଗ ନାହିଁ ଅଭିମାନ କିଛି

ବାଟକାଟି ଯାଏ ନିଃଶ୍ୱାସ

ମଶାଣି ବେଶୀ ଦୂର ନୁହଁ ଶେଷ ଠିକଣା

ଯେଉଁଠି ବନ୍ଧା ପଡ଼ିବ ଶରୀର ପାଉଁଶ ।

ମଶାଣି ପାଖ ବୁଢ଼ା ବରଗଛ ମୂଳରେ

ଜଳି ଉଠିବ ଜିଅନ୍ତା ଶବ

ଶେଷ ସ୍ପନ୍ଦନ ଖୋଜି ବୁଲିବ ସେଇ

ମଶାଣି ଭଙ୍ଗା ଦେଉଳ ପାଖ ।

ଏକମାତ୍ର କାମନାର ଶେଷ ପରିଚୟ

ଅବସର ନେଉଥିବା ଆଲୋକ

ସମାପ୍ତି ଭିତରେ ଗଢିଥିବା ସନ୍ତକ

ମଶାଣି ଭୂଇଁର ଅଧାଗଢ଼ା ଦେଉଳ ।

ଦେବ ସାକ୍ଷୀ ପ୍ରମାଣ ମୋ ପାଇଁ ଦିନେ

ଗଢ଼ିବା ସନ୍ତକ ମଶାଣି ମାଟିରେ

ପାଉଁଶ ଭିତରୁ ଚିତ୍କାର ଶୁଣିବେ ସମସ୍ତେ

ଦେଖିବେ ଅସମୟ ମୃତ୍ୟୁ ବେଳରେ ।