Library
Profile
ମରଣର ପରାଜୟ
ମରଣର ପରାଜୟ
କୋଲପ ପଡିଛି ସାରା ଭାରତରେ
କୋରନା ଭୁତାଣୁ ପାଇଁ
ସର୍ବେ ଆତଙ୍କିତ ବଂଚିବା ଦାୟରେ
ଚିତ୍କାରନ୍ତି ତ୍ରାହି ତ୍ରାହି ।
ଶୂନ୍ୟତା ଭରିଛି ବିଶ୍ୱ ଦରବାରେ
ଜୀବନ ପଡିଛି ଫିକା
ଦୂରତା ନରଖି ଚଳିଲେ ମାନବ
ବଂଚିବା ବଢିବା ଫାଙ୍କା ।
ମୃତ୍ୟୁ ଅଧିଶ୍ବର ସଦା ତତପର
ଆଦେଶନ୍ତି ଯମ ଦୂତ
ଯାଅ ଦୂତଗଣ ଅତି ତତକ୍ଷଣ
ଭ୍ରମିଵ ସାରା ମରତ ।
ଯେଉଁଠି ଦେଖିବ ଧରାବାସୀଗଣ
ଅସଦଚାରରେ ଲିପ୍ତ
ଅନୁଶାସନର ଧାର ଧାରନ୍ତିନି
ଆତ୍ମ ସ୍ୱାର୍ଥେ ହୋଇ ରତ ।
ନକରିଣ ଦୀର୍ଘ ବାନ୍ଧିଆଣି ଶୀଘ୍ର
ଫିଙ୍ଗିଦେଵ ଯମାଳୟେ
ନରକ ଯାତନା କଷ୍ଟ ବିଡମ୍ବନା
ଭୁଞ୍ଜଇବ କର୍ମ ମୋହେ ।
>
ମାନବ ଜୀବନ ଲଭିଣ ମରତେ
ଅପକର୍ମେ ସଦା ଲିପ୍ତ
ଧରମ ନିୟମ ଉଲଂଘନ୍ତି ସଦା
ଅସତ୍ୟେ ହୁଅନ୍ତି ରତ ।
ସମାଜ ସଂସ୍କୃତି ନୀତି କାନ୍ତି ରୀତି
ଭୁଲନ୍ତି ମାୟାରେ ପଡି
ଚରିତ୍ର ଚଳଣି ଆଦର୍ଶଙ୍କ ବାଣୀ
ଭ୍ରମରେ ଯାଆନ୍ତି ହୁଡ଼ି ।
ବେଳ ଥାଉ ବଂଧ ବାନ୍ଧରେ ମନୁଆ
ସମୟ ଦେଲାଣି ଡାକ
ସତ୍ୟ ଧର୍ମ ନ୍ୟାୟ ପାଳିଲେ ଜୀବନେ
କେବେ ବୁଡିବନି ଭେକ ।
ପୀୟୂଷ ଝରିବ ସରଗ ଧାମରୁ
ଦେବା ଦେବୀ ହେବେ ପ୍ରୀତ
ଦିବ୍ୟ ସନ୍ଧାନ ମିଳିବରେ ନିଶ୍ଚେ
ଜରା ବ୍ୟାଧି ହେବ ଲୁପ୍ତ ।
ଅନେକ ଭୁତାଣୁ ହୋଇଯିବେ ସ୍ଥାଣୁ
ନଥିବ କରୋନା ଭୟ
ରୋଗକୁ ଏଡାଇ ଚାଲିବୁରେ ତୁହି
ମରଣର ପରାଜୟ ।
