ମୋ ଗାଆଁ ରୁ ଚି଼ଠି ଆସିଛି

ଡ଼ାକ ବାଲା ଆଜି ସକାଳୁ ସକାଳୁ 

ଚି଼ଠି ଖଣ୍ଡେ ଫିଙ୍ଗି ଦେଇଛି 

ତାକୁ ମୁଁ ହାତରେ ଧରିଛି ଶ୍ରଧାରେ 

ମନ ଭରି ଟିକେ ଦେଖୁଛି ।

କେତେ ଦିନ ହେଲା ଗାଆଁ ଲୋକଙ୍କୁ 

ମୋ ମନରେ କବର ଦେଇଛି 

ଯେତେ ଭାବିଲେବି ଲୋକଙ୍କ ଚେହେରା 

ଅଚି଼ହ୍ନା ଅଚି଼ହ୍ନା ଲାଗୁଛି ।

କିଏ ଦେଲା ଚିଠି କାହିଁକି ଲେଖିଲା 

ସେ କଥା ଉପରେ ଭାବୁଛି 

କିଛି କିଛି ପୂର୍ବ ଅତୀତ କାହାଣୀ 

ମନେ ମୋର ଉଙ୍କି ମାରୁଛି ।

ଗାଆଁ ବରକୋଳି, ତେନ୍ତୁଳି, ଆମଡା଼ 

କଷା ,ମିଠା, ଖଟା ଖାଇଛି 

ପୋଖରୀ ଗଧୁଆ, ହଳଦୀ ବଟୁଆ 

ଆଜି ଏଠି ଝୁରି ହେଉଛି ।

ଦିନ ଦିପହରେ ଗଛମୂଳେ ବସି 

ଲୁଡୁ଼ପଟି ମଜା ନେଇଛି 

ବହୁଚୋରି ଖେଳ, କଙ୍କିଧରା ମେଳ 

ମନରେ ଗୁମୁରି ହେଉଛି ।

ମା ହାତ କାକରା ମାମୁଁ ଗାଁ ଯାତରା 

ଆଜି ଭାରି ମନ ହେଉଛି 

ମଲ୍ଲିଫୁଲ ମାଳ, କୁରେଇଁ ର ଡ଼ାଳ 

ମୁଣ୍ଡେ ମାରି ଗାଆଁ ବୁଲିଛି ।

କିଆର ବଣରୁ ଆମ୍ବ ବଉଳରୁ 

ତା ମହକ କେତେ ଲୁଟିଛି 

ଫୁଲ ବଗିଚାରେ ଖରା ବେଳଟାରେ 

ରଙ୍ଗ ପ୍ରଜାପତି ଧରିଛି ।

ଭୁଲି ଯାଇଛି ମୁଁ ଜନମ ମାଟିକୁ 

ସହରରେ ବାନ୍ଧି ହୋଇଛି 

ଟଙ୍କା ର ନିଶାରେ ମତୁଆଲା ହୋଇ 

ଗାଁ ଲୋକଙ୍କୁ ମୁଁ ଭୁଲିଛି ।

ମଟର ଚଢି ମୁଁ ଶଗଡ଼ ଗାଡ଼ିର

କେଏଁ କଟର କୁ ଭୁଲିଛି 

ମେସିନ ଧୂଆଁକୁ ସହି ମୁଁ କାଲିର 

ଗୋଧୂଳି କୁ ଭୁଲି ଯାଇଛି ।

ଭାଗବତ ଟୁଙ୍ଗୀ ରାମଲୀଳା କଥା 

ଫାଇଲ ଭିତରେ ଖୋଜୁଛି 

ସନ୍ଧ୍ୟା ହେଲେ ମୋବାଇଲ୍ ଫୋନ୍ ରେ 

ମୁଁ ଘଣ୍ଟା ଘଣ୍ଟା ବ୍ୟସ୍ତ ରହୁଛି ।

ଚ଼ିଠି ଖୋଲିବାକୁ ମନଟା ମୋହର 

ଗୋଳେଇ ଘାଣ୍ଟି ତ ହେଉଛି 

ଦେଖିଲି ଚ଼ିଠିରେ ସ୍ନେହର ଖବର 

କିଛି କିଛି ଲେଖା ହେଇଛି । 

ପଢ଼ିକି ଜାଣିଲି ଗାଆଁ ଘର ଆମ 

ଅଧାଅଧି ଭାଙ୍ଗି ଯାଇଛି 

ଘର ଜଗିଆ ମୋ ଘରର ଖବର

ଟିକିନିଖି ସବୁ ଲେଖିଛି ।

ମନକୁ ମୋହର ଟାଣ ମୁଁ କରିଲି

ଗାଆଁ ଘର ସଜ କରିବି

ଗାଆଁ ଲୋକସଙ୍ଗେ କଟିଥିବା ସେଇ

ସମ୍ପର୍କ କୁ ପୁଣି ଯୋଡି଼ବି ।

ମୁଁ ଯଦି ମୋହର ଗାଆଁକୁ ଭୁଲିବି 

ମୋ ପିଲେ କି ମୋତେ ଯଗିବେ 

ନିଜ କଥା ଭାବି ସୁଦୂର ରାଇଜେ 

ନୁଆଁ ଦୁନିଆରେ ରହିବେ ।

ବେଳ ଥାଉଥାଉ ବନ୍ଧ ବାନ୍ଧିବାକୁ 

ଆଜି ମୁଁ ମନସ୍ଥ କରିଛି 

ଗାଆଁକୁ ଯିବି ମୁଁ ନିଶ୍ଚୟ କାଲିକି 

ମୋ ଗାଆଁ ରୁ ଚି଼ଠି ଆସିଛି ।