Library
Profile
ମୋ' ଦେଶ ମହାନ
ମୋ' ଦେଶ ମହାନ
ଚିର ବନ୍ଦନୀୟା ଭାରତ ମାତାର
ସନ୍ତାନ ରୂପରେ ଗର୍ବିତ ମୁହିଁ
କେଉଁ ପୁଣ୍ୟବଳେ ଜନମି ତା' କୋଳେ
ବଢିଲି ତା'ପାଣି ପବନ ଛୁଇଁ ।
ସବୁଜ କ୍ଷେତର ସୁନାର ଫସଲ
ଭରିଛି ମୋ'ଦେହେ ରକତ ଧାର
ନିର୍ମଳ ଶୀତଳ ଝରଣାର ଜଳ
ତୃଷ୍ଣା ନିବାରଣ କରିଛି ମୋର ।
ହିମାଳୟ ଗିରି ସଇନିକ ପରି
ଶତ୍ରୁର କବଳୁ କରୁଛି ରକ୍ଷା
ନିର୍ଭୟରେ ମୁହିଁ ପାରୁଅଛି ଜୀଇଁ
ଦେଇଅଛି ମୋତେ ମୁକତି ଶିକ୍ଷା ।
ତିନି ପାରୁଶରେ ବିଶାଳ ସାଗର
ଅରପି ଦିଅନ୍ତି ସ୍ନିଗ୍ଧ ସମୀର
ଗ୍ରୀଷମର ତାତି ହେମାଳର ଭୀତି
ସହିନି କେବେବି ମୋର ଶରୀର ।
r>
ମୋ 'ଦେଶ ସଂସ୍କୃତି ପ୍ରଥା ରୀତିନୀତି
ସବୁଠୁ ସୁନ୍ଦର ଅତି ମଧୁର
ବିଶ୍ୱ ଭ୍ରାତୃଭାଵ ଶାନ୍ତି ସଦଭାବ
କରିଛି ଜୀବନେ ମୁହିଁ ନିଜର ।
ଅନନ୍ୟ କୀରତ୍ତି ଭରିଅଛି ତୃପ୍ତି
ଶିଖାଇଛି ମୋତେ ଜ୍ଞାନକୌଶଳ
ଅହିଂସାର ବଳ ଶାସନର କଳ
ଦୂରେଇଛି ମନୁ ସ୍ୱାର୍ଥ ଗରଳ ।
ଆମ ସମ୍ବିଧାନ କେତେ ଯେ ମହାନ
ଦେଇଅଛି ମୋତେ ସ୍ଵଅଧିକାର
ସ୍ୱାଧୀନ ବିହାର ସ୍ୱାଧୀନ ବିଚାର
ଧର୍ମେ କର୍ମେ ମୁକ୍ତ ମୁଁ ନିରନ୍ତର ।
ସ୍ୱଚ୍ଛ ହୃଦୟରେ କର୍ତ୍ତବ୍ୟ ପଥରେ
ଅଗ୍ରସର ହେବି ନିଷ୍ପତ୍ତି ମୋର
ଗାଉଥିବି ଗୁଣ ମୋ' ଦେଶ ମହାନ
ପୂଜୁଥିବି ସଦା ତା'ର ପୟର ।
