ମନରେ ଆସୁ ଶୁଦ୍ଧ ଭାବନା

ମନରେ ଆସୁମୋ ଶୁଦ୍ଧ ଭାବନା

ହୃଦୟ ହେଉ ମୋ ପୂତ 

ଗାଉଥିବି ସଦା ପ୍ରଭୁଙ୍କର ନାମ

ଜୀବନେ ଥିବା ପର୍ଯ୍ୟନ୍ତ l

ନ ଛୁଉଁ ମନକୁ କଳୁଷ କାଳିମା

ଈର୍ଷା ଦ୍ୱେଷ ଅହଙ୍କାର 

ସଭିଙ୍କ ପାଇଁ ମନରେ ମୋହର

ଝରୁ ସ୍ନେହ ପ୍ରେମ ଧାର l

ସାତ୍ତ୍ଵିକ ଭୋଜନ କରିବି ଗ୍ରହଣ

ଜୀବ ଠାରେ ରଖି ଦୟା  

ସକଳ ପ୍ରାଣୀଙ୍କୁ ସମାନ ଭାବିବି

ଦୂରେଇ ସକଳ ମାୟା l

ଦେହ ମନ ସ୍ୱଚ୍ଛ ପୂତ ରହିଥିଲେ

ହୋଇବ ତାହା ମନ୍ଦିର 

ବିରାଜିତ ନିଶ୍ଚେ ହୋଇବେ ତହିଁରେ

ମୋ ପ୍ରଭୁ କଳା ଠାକୁର l

ଦୋଷ ଦୁର୍ବଳତା କାହାର ମୋହର

ନ ଦେଖୁ ଏହି ନୟନ 

ସଭିଙ୍କର ଭଲ ଗୁଣଟିକୁ ମୁହିଁ

କରିବି ସଦା ଗ୍ରହଣ l

ଦୁଃଖୀରଙ୍କୀଙ୍କର ସେବାରେ ମୋ ମନ 

ସର୍ବଦା ଆଗେଇଯାଉ  

ତାଙ୍କରି ଭିତରେ ପ୍ରଭୁ ବିରାଜିତ

ଏହି ଭାବନାଟି ରହୁ l

ଗୀତା ଭାଗବତ ଧରମ ପୁସ୍ତକ

ପଢୁଥିବି ନିରନ୍ତର 

ପ୍ରଭୁଙ୍କର ନାମ ମନନ କୀର୍ତ୍ତନେ

ଯାଉ ଏ ଜୀବନ ମୋର ll