ମନରେ ଆସୁ ମୋ ଶୁଦ୍ଧ ଭାବନା
ମନରେ ଆସୁ ମୋ ଶୁଦ୍ଧ ଭାବନା
ଜଗତ ନିର୍ମିତ ଜଣେ ଆନ ହିତ
ସାଧନେ ତିଆରି ସଦ୍ଭାବନା
ନର ଦେହ ଧରି ଜନମ ଲଭିଛି
ମନରେ ଆସୁ ମୋ ଶୁଦ୍ଧ ଭାବନା ।
ଗଙ୍ଗା ଜଳ ସମ ସ୍ବଚ୍ଛ ପାବନ
ଝରିପଡୁ ହୃଦୁ ମମତା ବାରି
ସେଥିରେ ପ୍ଳାବିତ ମନ ପ୍ରଫୁଲ୍ଲିତ
ହୋଇଉଠୁ ଆନଟିର ଯେପରି ।
ଜଗତ କଲ୍ୟାଣ ପଥେ ଧାବମାନ
ହେଉଥାଉ ମୋର କଲମ ମୁନ
ପାଠକେ ସେଥୁରୁ ତୋଳି ଚାଲୁଥାନ୍ତୁ
ସୁଶିକ୍ଷା, ସଂସ୍କାର, ଖୁସି ପ୍ରସୂନ ।
ବିନ୍ଦୁ ବିନ୍ଦୁ ଜଳେ ସାଗରର ସୃଷ୍ଟି
ଶୁଦ୍ଧ ଶୁଦ୍ଧ ମନ ଏକାକାରରେ
ଗଠନେ ପାବନ ଜନ-ରତ୍ନାକର
ଶାନ୍ତି, ତୃପ୍ତି ଭରିଦେବ ଧରାରେ ।
ମନ୍ଦ ଭାବନା ନିଜକୁ ଯାତନା
ଅଶାନ୍ତ ଅସ୍ଥିର କରଇ ମନ
ଉତ୍ତମ ଭାବନା ଉତ୍ତମ ପାଉଣା
ଆନଠାରୁ ମିଳି ହୃଦୟ ପୂର୍ଣ୍ଣ ।
ଆଶା ବିଶ୍ବାସରେ ବିଭୁ ଭରସାରେ
କର୍ମ ଅନୁସରି ଚାଲି ନିଇତି
ଶୁଦ୍ଧ ଭାବନାରେ ବିଭୁ ପାଦ ତଳେ
ପ୍ରତିକ୍ଷେଣେ ବାଢୁଥିବି ପ୍ରଣତି ।