ମନେ ରଖିଛ ନା

ମନେ ରଖିଛ ନା ସାଥି ଯାଇଅଛ ଭୁଲି

ସେଦିନର ମିଠାସ୍ମୃତି ଆମ ବୁଲାବୁଲି ।

ବସିଥିଲ ପାଶେ ମୋର ଯାତ୍ରା ସମୟରେ

ସୁରକ୍ଷିତ ମଣିଥିଲି ଅତି ବିଶ୍ୱାସରେ ।

ଚାଲୁଥିଲେ ପଥଧାରେ ମୋର ହାତଧରି

ନିର୍ଭୟରେ ହସୁଥିଲି ହୃଦେ ପ୍ରୀତି ଭରି ।

ନୀରବତା ଭଙ୍ଗ କରି ଗପୁଥିଲେ ଦୁହେଁ

ଭିଜୁଥିଲେ ପୀରତିରେ କାମନାରେ ନୁହେଁ ।

ବାପା ଭାଇ ସାଙ୍ଗ ସବୁ ସମ୍ପର୍କର ଆଶ

ପାଇଥିଲି ତୁମଠାରୁ ଓଠେ ମାଖି ହସ ।

ଆପଣାର କେହି ଜଣେ ପରିଚୟ ଦେଇ

ବନ୍ଦୀ କରିଥିଲ ମୋତେ ପ୍ରେମିକଟେ ହୋଇ ।

ଆଖି କହୁଥିଲା କିଛି ଗୋପନ କାହାଣୀ

ହୃଦୟରେ ସ୍ଥାନଟିଏ ଦେଇଥିଲ କିଣି ।

ସଞ୍ଜ ଆସୁଥିଲା ନଇଁ ଝାପ୍ସା ଆଲୁଅରେ

ଫେରିଥିଲେ ଆମେ ଦୁହେଁ ଭିନ୍ନ ଆବେଗରେ ।

ତୁମ ଛାତି ପରେ ମଥା ରଖି ବସିଥିଲି

ସପନର ବାଲିଘର ଟିଏ ଗଢୁଥିଲି ।

ହସୁଥିଲା ଜହ୍ନ ଦେଖି ଆମ ମନ ପଢି

ପ୍ରୀତିଭରା ସମ୍ପର୍କର ଭାବ ଦେଲା ଯୋଡି ।