ମନ
ମନ
ଶୁଣରେ ପିଲାଏ ଶୁଣ
ଦେଇ ମନ ଧ୍ୟାନ,
କଥାଟି ଛୋଟିଆ ଅଟେ
କିନ୍ତୁ ମୂଲ୍ୟବାନ ।
ପିତା ମାତା ଗୁରୁଜନ
କଥା ସବୁ ମାନ,
ଉତ୍ତମ ମଣିଷ ରୂପେ
ଗଣା ହେବ ଜାଣ ।
କ୍ଷିପ୍ର ଯାନ ଅଟେ ମନ
ଏଣେ ତେଣେ ଧାଏଁ,
କଳ୍ପନାରେ ବୁଲିଆସି
ଆକାଶ କୁ ଛୁଏଁ ।
ମନ ଏକ ଅମାନିଆ
ଉଡ଼ନ୍ତା ଚଢେଇ,
କେତେବେଳେ ଉଡିଯାଏ
ଡେଣାକୁ ମେଲାଇ ।
ଚଞ୍ଚଳ ମନଟି ଭ୍ରମେ
ବିଚଳିତ ହୋଇ,
ଭଲ ମନ୍ଦ ବିଚାର ଟି
ବୁଝି ନପାରଇ ।
ମନକୁ ଲଗାମ ଦେଇ
ଆୟତ୍ତ କରିବ,
ଶ୍ରୀ ହରି ଚରଣେ ସଦା
ମନକୁ ରଖିବ ।
ଆଧ୍ୟାତ୍ମିକ ମାର୍ଗେ ଯଦି
ମନ ନିବେଶିଵ,
ଜୀବନରେ ସୁଖ ଶାନ୍ତି
ନିଶ୍ଚୟ ମିଳିବ ।
ମନ ଏକ ବ୍ୟୋମ ଯାନ
ପକ୍ଷୀରାଜ ଘୋଡା,
ସଂସ୍କାର ଶିକୁଳି ପରା
ମନ ପାଇଁ ଲୋଡ଼ା ।
ସ୍ଥିର ମନେ ବିଦ୍ୟା, ବୁଦ୍ଧି
କରିବ ଆୟତ୍ତ,
ଦେଶ ପାଇଁ କାମ କରି
ରଖିବ ଦୃଷ୍ଟାନ୍ତ ।
ବିଦ୍ୟା ଅଟେ ମହାଧନ
ନିବେଶିଲେ ମନ,
ସବୁଠାରୁ ବଡନିଶା
ଜ୍ଞାନ ଆହରଣ ।
ଜ୍ଞାନ ଥିଲେ ମିଳେ ପରା
ଆଦର ସର୍ବତ୍ର,
ବିଦ୍ୟାବଳେ ଜ୍ଞାନ ମିଳେ
ଜଗତେ ପୂଜିତ ।
ପିଲାମାନେ ତୁମେ ସବୁ
ଦେଶର ଭବିଷ୍ୟ,
ଭଲ କାମ କଲେ ମିଳେ
ପ୍ରଶଂସା ଅବଶ୍ୟ ।