ମନ ଖୋଜେ ସାଥିଟିଏ

ଆସିଛି ଫଗୁଣ ଫୁଲେଇ ମଳୟ

    ଶୁଭୁ ଅଛି କୁହୁସ୍ୱନ

ବଳୁଛି ଶରଧା  ବୋଳିବି ଅବିର

   ଦେହ ଯାକ ଗୋଟାପଣ ।

ଯୁଇ ଯାଈ ମଲ୍ଲି କେତକୀ ବଉଳେ

   ଚହଟେ ମଧୁର ବାସ

ନବ କିଶଳୟେ ହଳଦୀ ବସନ୍ତ

   ସମ୍ଭାଷଣ କରେ ତୋଷ ।

ସବୁଜ ପ୍ରକୃତି ଦିଶଇ ସୁନ୍ଦର

   ପଲ୍ଲବିତ ଫୁଲ ଫଳ

ଆନନ୍ଦ ଉଲ୍ଲାସେ ପୁଲକେ ପରାଣ

   ରଙ୍ଗ ର ଉଠେ ଜୁଆର ।

ମଧୁ ବସନ୍ତର ରଙ୍ଗ ସମାହାରେ

   ହୃଦ ମନେ ଖେଳେ ଢେଉ

ମୃଦୁ ମନ୍ଦ ତାନେ ଖେଳେ ଶିହରଣ

   ପ୍ରେମ ସ୍ପର୍ଶ ନୂଆ ପାଉ ।

ନୀଳ କଇଁ ଖୋଜେ ଜହ୍ନକୁ ତାହାର

   ଖୋଜେ ପଦ୍ମ ଦିବାକର

ମନ ଖୋଜୁଥାଏ ସାଥି ସ୍ନେହ ପ୍ରୀତି

  ଇହକାଳ ଆପଣାର ।