ମନ ଆକାଶରେ ଜହ୍ନ

ଲୁଚି ଗଲାଣି ଲୋ ଅମାବାସ୍ୟା ରାତି

ଅନ୍ଧାର ଗଲାଣି ହଜି

ନୀଳ ଆକାଶରେ ଜହ୍ନ ଜଳୁଛି ଲୋ

ତାରାଗଣ ମିଞ୍ଜି ମିଞ୍ଜି I

ଛୁଟି ଆସିଲାଣି ଶେଫାଳୀ ମହକ

ଉଲ୍ଲସି ଗଲାଣି ମନ

ମନ୍ଦ ମନ୍ଦ ବାଆ ଦେହ ଛୁଇଁଲାଣି

ଆଖି ଦେଖିଲାଣି ସ୍ୱପ୍ନ I

ତୁମରି କଣ୍ଠରୁ ଭାସି ଆସିଲାଣି

ସୁଲଳିତ ସ୍ୱରେ ଗୀତ

ଖୁସିର ଲହଡି ଦେହ ଛୁଇଁଲାଣି

ମନ ହୋଇଲାଣି ପ୍ରୀତ I

ଚାହିଁଦେଖ ସଖୀ ମନତଳୁ ମୋର 

ଅପସରିଲେଣି ଦୁଃଖ

କ୍ଷତଭରା ମୋର ହୃଦୟତଳୁ ଲୋ

ଉଙ୍କି ମାରିଲାଣି ସୁଖ I

ପ୍ରତିକ୍ଷାର ଅନ୍ତ ହୋଇ ଆସିଲାଣି

ବାଟ ଆସିଲାଣି ସରି

ମନତଳେ ମୋର ଶତ କଦମ୍ବର

ରୋମାଞ୍ଚ ଗଲାଣି ଭରି I

ଶେଷ ହୋଇଆସେ ବିଷାଦର ଘଡି

ମିଳନ ଆତୁର ମନୁ

ମେଘଢଙ୍କା ମୋର ଛାତିର ଆକାଶେ

ଉଇଁଲାଣି ଇନ୍ଦ୍ରଧନୁ I