ମିଳନର ପର୍ବ ହୋଲି

ମିଳନର ପର୍ବ ଜାଗୃତିର ପର୍ବ,

   ସଦଭାବନା ପର୍ବ ହୋଲି

ହୃଦୟେ ଝରଇ ପ୍ରୀତିର ମହ୍ଲାର,

   ପର ଆପଣାର ଭୁଲି ।

ମଳୟ ସମୀରେ ଆମ୍ବ ବଉଳରେ,

   ପିକ କୁହୁ ତାନେ ଆସେ

ଚୈତ୍ର କୃଷ୍ଣପକ୍ଷ ପ୍ରତିପଦା ଦିନ,

   ପ୍ରୀତି ପ୍ରୀତି ଖାଲି ବାସେ ।

ନବ କିଶଳୟ ମଞ୍ଜୁଳ ସୁମନେ,

    ସାତ ରଙ୍ଗ ମାଧୁର୍ଯ୍ୟରେ

ମଧୁର ମୂର୍ଚ୍ଛନା ଅବିର ରଙ୍ଗରେ,

   ଭାଈଚାରା ମନେ ଭରେ ।

ଏକ ହୁଏ ମନ ଏକଇ ଭାବନା,

   ଭାତୃଭାବ ମନେ ଖେଳେ

ମିଳନର ପର୍ବ ଫଗୁଣ ରଙ୍ଗରେ,

   ପ୍ରେମ ନାଲିରଙ୍ଗ ବୋଳେ ।

ହୋଲି ଆଣିଥାଏ ଖୁସିର ପସରା,

   ମିଳନ ପିୟାସୀ ଫଗୁ

ବର୍ଣ୍ଣ ମହୋତ୍ସବ ଫୁଲର ରୋଷଣୀ,

   ଝରେ ଧରାଣୀର ଅଙ୍ଗୁ ।

ପ୍ରେମରେ ଅଧୀର ରଙ୍ଗରେ ବିଭୋର,

    ପ୍ରକୃତିର ଦିବ୍ୟ ଅଙ୍ଗ

ନବୀନ ଉଲ୍ଲାସେ ବସନ୍ତ ବିଳାସେ,

    ଲଭିବାକୁ ପ୍ରିୟ ସଙ୍ଗ ।

ସତ୍ୟରୁ ତ୍ରେତୟା ଦ୍ୱାପରରୁ କଳି,

   ରଙ୍ଗେଈ ହୋଇଛି ହୋଲି

ଜାଗ୍ରତ କରିଛି ସୁପ୍ତ ଆତ୍ମାକୁ,

   ଚେତନାର ରଙ୍ଗ ବୋଳି ।

ସତ୍ୟରେ ହୋଲିକା ଦହନ ହୋଇଛି,

   ରକ୍ତଜବା ହୋଲି ଖେଳି

ତ୍ରେତୟାରେ ରାମ ଦୁର୍ଗାଙ୍କୁ ପୂଜିଲେ,

   ଶତ୍ରୁ ଲହୁ ହେଲା ହୋଲି ।

ଦ୍ୱାପରେ ଶ୍ରୀକୃଷ୍ଣ ମେଷlଶୁର ମାରି,

    ରକ୍ତ ପିଚକାରୀ ଧରି

ଅଧର୍ମ ଉପରେ ଧର୍ମର ବିଜୟ,

   ଆନନ୍ଦ ଗୋପ ନରନାରୀ ।

ଶ୍ରୀରାଧା ସୁନ୍ଦରୀ ମଦନ ମୋହନ,

   ଷୋଳଶସ୍ର ଗୋପାଙ୍ଗନା

ସାତରଙ୍ଗ ମାରି ଖେଳିଥିଲେ ଫଗୁ,

   ଭିଜିଥିଲେ କଳାକାହ୍ନୁl ।

ସାତଟି ରଙ୍ଗର ସମାହାର ନୁହେଁ,

   ଭିଜଇ ଶରୀର ଅଙ୍ଗ

 କହ୍ନେଇର ରଙ୍ଗ ଲାଗିଲେ ମନରେ,

   ହୁଅଇ ସେ ଆଠ ରଙ୍ଗ ।

ସବୁ ରଙ୍ଗ ସିନା ଦେହରୁ ଛାଡଇ,

   ଛାଡେନି ମୋହନ ରଙ୍ଗ

ମୋହିନୀ ରଙ୍ଗରେ ଆତ୍ମା ରଙ୍ଗିଯାଏ,

   ଲଭିବାକୁ ଶ୍ୟାମ ସଙ୍ଗ ।

ଅନ୍ତର ଚେତନା ବିକଶିତ ହୁଏ,

   ଭକ୍ତିରଙ୍ଗ ମାଖି ହେଲେ

ରାଧାତତ୍ତ୍ୱ ନେଇ ଦିବ୍ୟ ଦୃଷ୍ଟିରେ,

   ମାଧବଙ୍କୁ ଚାହିଁଦେଲେ ।

ମନ ଯଜ୍ଞଶାଳା ଧୂମାୟୀତ୍ୱ ହୁଏ,

   ରାଧା କୃଷ୍ଣ ଭାବ ହେଜି

ଗୋଲାପି ଗୋଲାପି ଫଗୁଣ ମାସରେ,

   ଗୋପୀ ମନୋଭାବେ ମଜ୍ଜି ।

ପବିତ୍ର ଭାବନା ମୈତ୍ରୀ ସଦଭାବନା,

   ପର୍ବ ହୋଲି ଜାଗୃତିର

ଦିବ୍ୟତ୍ୱ ପ୍ରକାଶ ଏ ମଧୁମାସରେ,

   ପ୍ରୀତିରାଜ ଫାଲ୍ଗୁନର ।