ମହତ୍ତ୍ୱାକାଂକ୍ଷାର ଭାବ
ମହତ୍ତ୍ୱାକାଂକ୍ଷାର ଭାବ
କାଳ କର୍ମ ବଳେ ଜାତ
ଆଗତ ସ୍ୱାଗତ ରତ ଗତ,
ବ୍ରତ ବିଦ୍ୟାରତ ଅନୁଗତ କାର୍ଯ୍ୟରତ
ବିଦେଶଗତ ଦେଶହିତ ସମାହିତ,
ଅକସ୍ମାତ ଆହତ ଜରାଗ୍ରସ୍ତ ମୃତ
ତନ୍ନିମିତ୍ତ ଶେଷକୃତ୍ୟ ଅମୃତପ୍ରାପତ ।
ଜନ୍ମପରେ ଉଲ୍ଲାସ କେଶ ବେଶ ଆକାଶ
ମୁଖରିତ ସାରା ପରିବାର ଓ ଦେଶ
କୁଆଁ କୁଆଁ ଡାକ, କୁନି କୁନି ମୁରୁକି ହସ
ନାମକରଣ ବିଦ୍ୟାଅଧ୍ୟୟନ ଚିରପର୍ବ ଶେଷ ।
ଅଂକ, ଅଧ୍ୟାୟ, ପ୍ରସଂଗ
ପ୍ରକରଣ ବିଷୟ ସନ୍ଦର୍ଭ,
ସଖା ସଂଗିନୀ ମିଳନ ବିଚ୍ଛେଦର
ବହୁ ଗଳ୍ପ ପାର୍ଥିବ କେତେ ଅଭିନୟ ।
ପୁଣି ସେଇ ଖର୍ବ ଅଥର୍ବ
ସବୁ ଚରିତ୍ରର ଗର୍ବ
ଭରିଦିଏ ଜୀବ ଜୀବନରେ
କେତେ ଉପମା ଉପସର୍ଗ
ଭାବ ଅଭାବ ସଦଭାବ
ଓ ଶବ୍ଦ ଅର୍ଥର ନର୍କ ସ୍ୱର୍ଗ ।
ଫଳ ଆଶା ଲାଳସାର ବଳି,
ଗଳେ ଫୁଲମାଳର ମାଳି
କେତେବେଳେ କାନଫଟା ଗାଳି
ତୋ ପୁଣି ଅଗଣିତ ଲୋକ ଅଜସ୍ର କରତାଳି ।
କେତେ ଆଲୋଚନା
ଅନାବନା ରଚନା
ସାଧନା ବନ୍ଦାପନା
ସମାଲୋଚନା ମନା
ଜନମନ ଧନ ମାନ ସମ୍ମାନ
ସ୍ୱପ୍ନ ଉପଢୌକନ ଯାନବାହନ
ମତ ମତାନ୍ତର କଳୁଷିତ ମନ
ଅବା ଅନନ୍ୟ ଉତ୍କୃଷ୍ଟ ଜୀବନ ।
ମାୟା ମୋହର ଯେତେ ସିଡି
ପ୍ରେମର ପାହୁଚ ଚଢି଼ ଚଢି଼
ମାୟାଜାଲରେ ପଡ଼ି ଗଢି
କେତେ ଜଣା ଅଜଣା ଅଶୁଣା
ହୋଇ ବାଟବଣା ପୁରୁଣା ଜଣାଶୁଣା ଅଗଣା ।
କେତେ ନଗନ୍ୟ ଜଘନ୍ୟ ସାମାନ୍ୟ
ପୁଣି କେତେ ଗନ୍ୟ ମାନ୍ୟ ବରେଣ୍ୟ
ରୁପାନ୍ତର ଓ ଲୋକ ଲୋକାରଣ୍ୟ
ମନ ହୃଦୟରେ ଏକ ଉତୁଂଗ ଢେଉ
ମହତ୍ତ୍ୱାକାଂକ୍ଷାର ଭାବ ଅଭାବ ଶୂନ୍ୟ ।