ମହିଳା ଦିବସ ଅନୁଚିନ୍ତା

ମହିଳା ଦିବସେ ପ୍ରଥମେ ବନ୍ଦିଲି

ସ୍ନେହମୟୀ ମୋର ମାତା

ଦ୍ୱିତୀୟେ ବନ୍ଦିଲି ମାତୃ ପିତୃକୁଳ

ତୃତୀୟରେ ଜନ୍ମ ଦାତା l

ନାରୀଙ୍କ ସମ୍ମାନ ନାରୀଙ୍କ ପୂଜନ

ଯେଉଁଠାରେ ହେଉ ଥାଏ

ସେଠାରେ ବସନ୍ତି ଦେବତା ନିଶ୍ଚୟ

ବେଦ ଏହା କହିଥାଏ l

ସର୍ବ ଶୁଭ କାର୍ଯ୍ୟ ଆରମ୍ଭ ହୁଅଇ

ପଞ୍ଚ କନ୍ୟା ନାମ ସ୍ମରି

ଅହଲ୍ୟା, ଦ୍ରୌପଦୀ, ସୀତା, ତାରା ତଥା 

ମହିୟସୀ ମନ୍ଦୋଦରୀ l

ଇତିହାସ କହେ ମୈତ୍ରେୟୀ, ଗାର୍ଗେୟୀ

ରଚିଥିଲେ ବେଦ ମନ୍ତ୍ର

ଲକ୍ଷ୍ମୀବାଇ,ଦୁର୍ଗାବତୀ,ଶୁକଦେଇ

ଧରି ଥିଲେ ପୁଣି ଅସ୍ତ୍ର l

ଭାଲେନ୍ତିନା ଗଲେ ମହା ଆକାଶକୁ

ପୁଣି କଳ୍ପନା ଭଉଣୀ

ବଚେନ୍ଦ୍ରୀ, କଳ୍ପନା ଶୃଙ୍ଗ ଚଢ଼ିଥିଲେ

ହିମାଳୟ ଶୈଳଶ୍ରେଣୀ l

ସମାଜରେ ନାରୀ ଅଟେ ମେରୁ ଶୃଙ୍ଗ

କେତେ ରୂପେ ତାର କାୟା

ଜନନୀ, ଭଗୀନି, କନ୍ୟା, ଭାତୃବଧୂ,

ପିଉସୀ, ମାଉସୀ, ଜାୟା l

ନାରୀ ଅଟେ ଦୁର୍ଗା, ଲକ୍ଷ୍ମୀ,ସରସ୍ବତୀ

ସାବିତ୍ରୀ, ଗାୟତ୍ରୀ,ସତୀ

ମହାମାୟା, କାଳି, ତାରା ପୁଣି ଆଉ

ନାରାୟଣୀ, ପାରବତୀ l

ମୀରାବାଇ ପୁଣି କୃଷ୍ଣ ପାଗଳିନୀ

କଳି ଯୁଗର ସେ ରାଧା

ଇନ୍ଦିରା, ନନ୍ଦିନୀ ନେତ୍ରୀ ଶିରୋମଣି

ନ ମାନି ସମାଜ ବାଧା l

ରଣେ ରଣଚଣ୍ଡୀ ଦୁରଗତି ଖଣ୍ଡି

ଗୃହଲକ୍ଷ୍ମୀ ସେହି ଘରେ

ନାରୀ ସର୍ବଂସହା ନାରୀ ବନ୍ଦନୀୟା

ପୁଜା କର ତାର ଧୀରେ l