ମହାପ୍ରଭୁଙ୍କ ଘୋଡ଼ଲାଗି ବେଶ
ମହାପ୍ରଭୁଙ୍କ ଘୋଡ଼ଲାଗି ବେଶ
ଦାରୁ ବ୍ରହ୍ମ ମୂର୍ତ୍ତି ତୁମେ ପରଂବ୍ରହ୍ମ
ଧନ୍ୟ ତୁମ ଲୀଳା ଅପରମ୍ପାର
ଶ୍ରୀ ନୀଳ କନ୍ଦରେ ଏ ମାନବ ପାଇଁ
ଲୀଳା କର ତୁମେ କଳା ଠାକୁର ।
ମାନବୀୟ ଲୀଳା କର ମହାପ୍ରଭୁ
ସକାଳରୁ ସଂଜ ପ୍ରତି ପାଦରେ
ଭକତ ପାଇଁ କି ଲୀଳା ଲଗାଇଛ
ବସି ରହି ତୁମେ ବଡ଼ ଦେଉଳେ ।
ଋତୁ ପ୍ରବାହରେ ତୁମରି ମନ୍ଦିରେ
ବିଭିନ୍ନ ନୀତି ଯେ ହୋଇ ତ ଥାଏ
ବେଶରେ ବେଶରେ ସନ୍ଦେଶ ଦିଅ ହେ
ଭକତ ଆନନ୍ଦେ ଅଧିର ହୁଏ ।
ମାର୍ଗଶୀର ମାସ ଜାଡ ସମାଗମ
ମାନବୀୟ ଲୀଳା କର ହେ ପ୍ରଭୁ
ସତେ ଅବା ତ୍ରସ୍ତ ଚତୁର୍ଦ୍ଧା ମୂରତି
ଘୋଡ଼ ଲାଗି ବେଶ ହେ ମହାବାହୁ ।
ମାର୍ଗଶୀର ମାସ ଶୁକ୍ଳ ଷଷ୍ଠୀ ତିଥି
ଏ ଅପୂର୍ବ ବେଶ ଆରମ୍ଭ ହୁଏ
ମାଘ ମାସ ଶୁକ୍ଳ ପଞ୍ଚମୀ ତିଥିରେ
ସମାପନ ଏହା ହୋଇ ଯେ ଥାଏ ।
ରତ୍ନ ସିଂହାସନେ ଓଢ଼ଣ ହୁଅ ହେ
ଶୀତ ବସ୍ତ୍ର ଆହା କେଡେ ସୁନ୍ଦର
ସାତଟି ଦିନରେ ସାତ ପ୍ରକାରର
ବସନ ରେ ତୁମେ କି ମନୋହର ।
ପୁଷ୍ପାଳକ ଙ୍କର କେଡ଼େ ଭାଗ୍ୟ ସତେ
ମଇଲମ କରି ଦିଅନ୍ତି ପରା
ପୂଜାପଣ୍ଡା ପରା ସୌଭାଗ୍ୟବନ୍ତ ଯେ
ଘୋଡ଼ ଲାଗି ବେଶ କରାନ୍ତି ସାରା ।
ଏ ମଣିଷ ପରି ପ୍ରଭୁ ଜଗନ୍ନାଥ
ଦିନ ଚର୍ଯ୍ୟା ତୁମ ହୋଇ ଯେ ଥାଏ
ଘୋଡ ଲାଗି ବେଶ ଆହା କି ସୁନ୍ଦର
ଖଣ୍ଡୁଆ ପାଟ ଯେ ଶୋଭା ବଢାଏ ।
ଜଗତ ଜନଙ୍କ ପ୍ରିୟ ଠାକୁର ହେ
ଜଗତକୁ ଦିଅ ଜୀବନ ବାର୍ତ୍ତା
ବେଶରେ ବେଶରେ ଭକ୍ତ ମନ ମୋହ
ତୁମେ ଅଟ ପ୍ରଭୁ ଜଗତ କର୍ତ୍ତା ।
ଜନମ ଜାତକେ ତୁମେ ତ ଥାଅ ହେ
ଭାଗ୍ୟ ଡୋରୀ ପ୍ରଭୁ ତୁମରି ହାତେ
ଏ ଭବ ସାଗରୁ ଉଦ୍ଧାର କର ହେ
ତୁମ କୃପାଦୃଷ୍ଟି ଢାଳ ଜଗତେ ।